Қиш кирмай музлаб қолган тиббиёт мажмуаси

Наманган вилоятининг Чортоқ тумани тиббиёт бирлашмаси ходимлари Элтуз нашрига йўллаган мактубда муассаса хоналарининг совуқдан музлаб қолганлиги, беморлар ва тиббиёт ходимлари бундан оғир аҳволда қолаётганини маълум қилишди.

Тиббиёт ходимларининг айтишича, ҳали қиш тўлиқ кириб улгурмасиданоқ касалхона биноларида иситиш тизими ишламаяпти, бу эса беморларнинг даволанишига ва ходимларнинг меҳнатига жиддий хавф солмоқда.

Мурожаат муаллифларининг ёзишича, бўлимда беморлар сони кўп, аммо ҳамма «устки кийимларда, қалин куртка-палтоларда» юришга мажбур. Аҳвол шу даражага етганки, тиббиёт ходимлари ўз ёнидан пул йиғиб, касаллар ётадиган палаталарга электр иситгичлар сотиб олган.

«Бу ҳам хавфли нарса, лекин иложимиз йўқ. Беморлар бундай совуқда тузалолмайди. Муолажаларда қийналаяпмиз,» — дейилади мактубда.

Шикоятда туман тиббиёт бирлашмаси бош врачи Маҳмудов ва соғлиқни сақлаш бошқармаси раҳбарияти мансабини суиистеъмол қилаётгани айтилади. Ходимларнинг фикрича, касалхонага анча миқдорда кўмир ажратилган бўлса-да, «ҳамма бўлимлар совуқ».

Мурожаатда бош врачнинг ҳар икки гапининг бирида ДХХдаги танишларини рўкач қилиши, раҳбарлик билан тилини бир қилиб олгани таъкидланади.

Шунингдек, шикоят муаллифлари тиббиёт бирлашмаси «тажриба-синовга тушди» дея ажратилган катта маблағлар бош врач ва бошқарма бошлиғи томонидан ўзлаштирилганини гумон қилмоқда. Уларнинг таъкидлашича, раҳбарият электрон тизимлардаги (ДМЕД) ишни бажаришни талаб қилгунча, аввало тиббиёт муассасасида «иссиқликни жойига қўйиб қўйиши» лозим.

«Туман ҳокими камерачи билан келади, номига иссиқлик котёли ёнида расмга тушиб кетади – ғирт майнавозчилик,» — дейилади мактубда.

Чортоқ тумани тиббиёт ходимлари Соғлиқни сақлаш вазирлигидан ушбу мурожаатга беэътибор бўлмасликни ва тиббиёт мажмуасидаги муздек шароитларни бартараф этиш бўйича тезкор чоралар кўришни илтимос қилмоқдалар.