Ўзбек мадоннаси келажаги йўқ боласини ўлдирди

Ўзининг уч яшар ўғлини бўғиб ўлдириб, дарахтлар остига ташлаб кетган андижонлик Саидахон Тиллаволдиева 3 апрель куни Тошкентда ҳибсга олинди.

Ижтимоий тармоқ фаоллари кейинги йилларда авж олган воқеадан шокда эканликларини ёзишмоқда.

«Ўз боласини сотиш, танасига ўнлаб нина санчиш, бўғиб ўлдириш, музлатиб ўлдириб, ахлатхонага ташлаб кетиш миллат фожеасига айланди!

Қонунчилик палатаси, Сенат тирикми?! Нега тегишли қарор, қонунлар қабул қилишмайди? Она, бола «приютлари» очилса бўлмайдими?! Биз оқибат билан эмас, сабаблар билан ишлашимиз керак», дея изоҳлайди воқеани ўзбекистонлик фаол Мирза Анвар.

Маҳаллий телеканалнинг «Замон» ахборот кўрсатувига интервью берган Тилаволдиева Тошкентда иш топишига халақит бергани учун боласини бўғиб ўлдиришга мажбур бўлганини айтади.

«Барибир бола кўчада хор бўлиб ўларди. Ўлдирганимдан кейин бағримга босиб ўтирдим, кечирим сўрадим», дейди Тилаволдиева.

Эридан ажраган Тиллаволдиева 23 мартгача отасининг уйида яшаган. Кейин уйидагилар билан жанжаллашиб, ўғли Фирдавсни олиб Тошкентга ишлагани кетган.

Боласи билан пойтахтдан иш топа олмаган аёл ўғлини танишиникида қолдириш учун Учкўприк туманига келган. Уни тополмагач, боласини Қўқон-Тошкент автобус бекатида ўлдириб, жасадни арчалар тагига яширганини айтади.

Eltuz.com