Доктор ва фермерларга милисалар қасам ичирди

Республика вилоятлари бўйлаб фермерларнинг «давлат хирмонига мўл ҳосил етказиб бериш» қасамёдига келтириши ижтимоий тармоқда кулгига сабаб бўлмоқда.

21 ноябрь куни далада ҳарбийлар каби белкурак ушлаган хоразмлик йигитларнинг, президентга ва фермер акаларига «содиқ ва сергак ишчи бўлишга, беллари синиб қолгунча ишлашга» қасамёди пародия қилинган видео тарқалди.

Видео сўнггида «қасамёд»ни қабул қилиб олган йигитнинг «Иш бажариш учун олға» буйруғи янграйди ва йигитлар аскарлар каби сафланиб, қўшиқ айтиб қадам ташлашади.

Бахтиёр акамни ўзи бир ёна,
Комил акамни ўзи бир ёна,
Эргаш акамни ўзи бир ёна

Изларини тополмай
Ман қоламан ҳайрона
Қорагўз бўй бўйи-бўй!
Қорагўз бўйи-бўй!

Расман Фермерлар кенгаши ташаббуси дея қабул қилинаётган, бироқ бош вазир селектор йиғинида берилган топшириққа асосан ўтказилаётган мажбурий-ихтиёрий «тантанали қасам ичиш» маросимлари ички ишлар ходимлари назорати остида 22 ноябргача давом этади.

Рассом Туз
Eltuz.com