ЕХҲТ миссияси: Ўзбекистондаги президент сайловида инсон эркинликлари чекланганича қолмоқда

Европада хавфсизлик ва ҳамкорлик ташкилоти (ЕХҲТ)нинг Демократик институтлар ва инсон ҳуқуқлари бўйича бюроси (ДИИҲБ) кузатувчилар миссияси 11 октябрь куни Ўзбекистондаги президент сайловига бағишланган оралиқ ҳисоботини чоп қилди.

Сайловнинг ҳуқуқий асосига доир қонун ҳужжатлари ислоҳот жараёнидан ўтаётгани, ДИИҲБнинг аввалги тавсияларидан айримлари амалиётга жорий этилганини урғулаган ЕХҲТ миссияси эътиборни бу йилги президент сайловида йўл қўйилаётган камчиликларга қаратади.

Ҳисоботда айтилишича, ДИИҲБнинг “фундаментал ҳуқуқ ва эркинликларни ҳимоя қилиш, сайлов ҳуқуқларини чеклаш ва мустақил номзодларни кўрсатишга тақиқларни олиб ташлаш билан боғлиқ” тавсиялари бажарилмаган.

Миссия қарийб 21,2 миллион сайловчи рўйхатга олинган сайловда оғир жиноятлар учун қамоқ жазосини ўтаётган маҳбуслар, шунингдек, суд томонидан, жумладан, ақлий ва руҳий сабабларга кўра лаёқатсиз деб топилган фуқаролар овоз бериш ҳуқуқига эга эмаслигини танқид остига олади.

ДИИҲБнинг оралиқ ҳисоботига кўра, Ўзбекистонда президентликка номзодлар ўртасида рақобат йўқ, юзма-юз мунозара кураши кўзга ташланмайди.

Ҳисоботда, шунингдек, журналист ва блогерларни қўрқитиш ва таъқиб қилиш, ОАВ учун тақиқлашга мойил қонун ҳужжатлари ва баъзи халқаро ОАВ ва инсон ҳуқуқлари ташкилотларининг веб-сайтларини ёпиш ҳолатларига эътибор қаратилган.

Ўзбекистонда 24 октябрда ўтадиган президент сайловига ЕХҲТ 26 давлатдан танлаб олинган кузатув миссиясини 15 сентябрда жўнатган эди. 

Шимолий Америка, Европа ва Осиёнинг 57 давлатини жамлаган ЕХҲТ дунёда тинчлик ва демократияни таъминлаш учун иш олиб бораётган йирик ташкилотдир.

Eltuz.com