Имомнинг секс ҳақидаги гапи танқидга учради (видео)

Канадалик ўзбек ҳуқуқшуноси Дилсора Фозилова 8 март куни «Элтуз» канали орқали юнусободлик имом Раҳматуллоҳ Сайфуддиновнинг «турк сериалларини кўрган аёллардан гейлар туғилади», деган фикрига муносабат билдирди.

Тошкентнинг Мирза Юсуф масжиди имоми Раҳматуллоҳ Сайфутдинов 2 март куни турк сериалларини қоралаб, улардаги чиройли эркакларни кўрган аёллар жинсий алоқа пайти уларни тасаввур қилса, бундай аёллардан «ҳаворанг (гей) болалар» туғилади”, деган гапни айтган.

Ўзбек имомининг бу фикри, Фозиловага кўра, бугунги кунда илмсизликдан бошқа нарса эмас.

«Масалан, баччабозлик 14-асрда кўпайиб кетгани, шунингдек, мусулмон давлатларида ҳам қайсидир тарихий даврларда кучайгани тўғрисида маълумотлар бор. Ўша пайтларда, масалан, бизда сериаллар йўқ бўлган, телевизор, телефон, расмлар, рекламалар йўқ бўлган. Лекин бундай ҳолат кенг тарқалган пайтлар бўлиб ўтган», дейди ҳуқуқшунос.

Аёллар эри билан жинсий алоқа пайти турк сериалларидаги йигитларни тасаввур қилади, деган имомнинг яна бир иддаосини Фозилова аёлларга қилинган туҳмат, деб билади.

«Тасаввур қилади, деб биз аёлларга туҳмат қиляпмиз. Агар тасаввур қилиш гуноҳ бўлса, бунинг учун сериал томоша қилиш шарт эмас. Улар кўчада, концертда, интернетда кўрган истаган одамини тасаввур қилиши мумкин, деб ўйлайман», дейди Фозилова.

Фозилова, шунингдек, «Элтуз» нашрига берган шарҳида агар диний институтлар, имомлар, муллалар, бугунги кунда турк сериалларни тақиқлашдан кўра, одамларни фойдали ишларга сафарбар қилганида, балки уларни қўллаган бўлишини билдирди.

Eltuz.com