OSI: Иноятовларнинг Россиядаги яна бир йирик сармояси очиқланди

Очиқ манбалар бўйича суриштирув ўтказувчи Open Source Investigations (OSI) журналистлар гуруҳи Иноятовлар оиласининг навбатдаги йирик сармоясини топди.

Санкт-Петербургдан 30 дақиқалик йўлда жойлашган «Невская усадьба» дея номланган бу қурилиш комплекси Рустам Иноятовнинг ўғли Шариф Иноятов бошқарувидаги Metkem ширкатига қарашлидир.

Бундан илгари Иноятовларнинг Австрия, Дубай ва Россиядаги беҳисоб мулклари ҳақида «Элтуз» нашри ҳикоя қилган эди.

МХХдагиларнинг бизнесменларга қарши сохта жиноят ишлари уйдириб келгани маълум. Бироқ бу ёпиқ хизмат ходимларининг ўзлари коррупционер бўлишган ва иш уйдирилган шахслардан бойлик орттириб келишган.

Metkem Санкт-Петербургда жойлашган Neva Alyans Grupp га тегишли бўлиб, бу ширкатга ҳам МХХ собиқ раисининг ўғли Шариф Иноятов 25 фоиз улуши бўлган икки шериги – Равшан Убайдуллаев ва Бахтиёр Фозилов билан бирга эгалик қилади.

Metkem ва Neva Alyans Grupp штаб квартираси Санкт-Петербургда, Нева проспектидаги 104-а уйда жойлашган.

7 миллион АҚШ доллари (400 миллион рубль) низомий сармоя билан қайд этилган Metkem йирик қурилиш ташкилоти ва девелопери саналади.

Кам қаватли уйлардан ташкил топган «Невская усадьба» лойиҳасини Metkem ширкати ишлаб чиққан. 109 та икки қаватли ва мансардли 6-12 хонали уйлардан ташкил топган бу қурилишлар 2016 йили бошланган.

Умумий майдони 36 гектар бўлган «Невская усадьба»,турар жой комплекси лойиҳасидир. У нафақат турар жойлар, балки дам олиш ва кўнгилочар масканлар, дўконлар, ресторанлардан тортиб, спорт марказлари ва болалар майдончаларини ҳам ўз ичига олади.

Мажмуа Нева дарёсининг ўнг қирғоғида, Санкт-Петербургдан 50 километр нарида Ленинград вилоятининг Всеволожск тумани Свердловск шаҳарчасидаги Новосаратовка мавзеида жойлашган.

Eltuz.com