АҚШ разведкаси: Путин урушни чўзишга интилади

NBC News телеканалига Америка разведкасининг хулосалари ҳақида хабардор манбалар қуйидагиларни маълум қилди.

Россия армиясининг катта йўқотишлари ва урушнинг тўртинчи йилида рецессия ёқасига келиб қолган иқтисодиётдаги муаммолар туфайли Путин ҳар қачонгидан ҳам ўта тажовузкор позицияни эгаллаган.

Энди у фалокатли йўқотишларни оқлаш учун кўпроқ Украина ҳудудларини босиб олиш ва умуман Украинани Россия учун «хавфсизлаштириш»га интилмоқда.

The Economist нашрининг ҳисоб-китобларига кўра, Россиянинг ҳозирги ҳужум суръатларида, масалан, Донбасс ва бошқа қисман босиб олинган вилоятларни тўлиқ эгаллаш учун бошлаган уруши 2030 йилгача чўзилиши мумкин. 

Нашрнинг таъкидлашича, май ойида Россия янги йирик ҳужумни бошлагандан бери, у Украина ҳудудининг атиги 0,4% ини эгаллай олди ва сезиларли муваффақиятга эришмади.