Жаҳон бозоридаги беқарорлик Ўзбекистон олтин заҳирасини оширди

Ўзбекистоннинг расмий олтин-валюта захиралари сўнгги йилларда кузатилмаган, тарихий рекорд даражагача ўсди. Марказий банк маълумотларига кўра, 2025 йилнинг 1 ноябрь ҳолатига бўйича, мамлакатнинг халқаро олтин захиралари 59,3 миллиард АҚШ долларига етган. Бу кўрсаткич, Spot.uz хабарига кўра, мамлакат тарихидаги энг юқори натижа сифатида қайд этилди.

Ўсиш сабаби нимада?

Марказий банк ҳисоботига кўра, мамлакатнинг олтин захиралари бир ой ичида 4,3 миллиард долларга кўпайган. Бу ўсишнинг асосий омили – жаҳон бозоридаги олтин нархининг йил бошидан буён деярли 50 фоизга кўтарилишидир.

Октябрь ойида олтин захираларининг қиймати 3,6 миллиард долларга ошиб, 47,8 миллиард долларга етди.

Қазиб олинган олтин ҳажми ҳам 11,6 миллион троя унциясидан 11,9 миллион унциягача ошган. Валюта активлари эса 731 миллион долларга кўпайган. Натижада Ўзбекистон Марказий банки балансидаги қимматли қоғозлар портфелининг қиймати ҳам бироз ўсиб, 1 миллиард 23 миллион долларни ташкил этган.

Жаҳон бозоридаги беқарорлик

Экспертлар олтин нархининг бундай кескин кўтарилишини қуйидаги учта омил билан изоҳламоқда:

 1. Жаҳон молия бозорларидаги беқарорлик.

 2. Геосиёсий қарама-қаршиликлар.

 3. АҚШ Федерал захира тизими (ФРС) сиёсатидаги ўзгаришлар.

Иқтисодчиларнинг таъкидлашича, бундай юқори захиралар Ўзбекистоннинг молиявий барқарорлигини мустаҳкамлайди ва унинг ташқи зарбаларга қарши туриш қобилиятини оширади.

Захираларнинг рекорд даражага етиши, айниқса, олтиннинг нархи ошиши ҳисобига рўй бераётгани, мамлакат иқтисодиёти учун ижобий сигналдир. Ушбу ҳолат Ўзбекистоннинг геоиқтисодий нотинчликлар даврида ўзини хавфсиз ҳис қилишига ёрдам беради.