Россияда Ўзбекистоннинг ҳайдовчилик гувоҳномаси тан олинмаслиги мумкин 

Россия Давлат Думаси спикери Вячеслав Володин мигрантларга янги чекловлар қўйилиши ҳақида гапирди. Энди ўзбекистонлик мигрантларнинг ҳайдовчилик гувоҳномалари тан олинмаслиги мумкин.

Бундан буён фақат рус тили давлат тили деб эътироф этилган давлатларнинг ҳайдовчилик гувоҳномалари тан олинади. Демак, Россия Ўзбекистонда рус тилини давлат тили сифатида тан олишимизни истайди. Мақсад – тил воситасида ўз вассаларини белгилаш. Рус тили Ўзбекистонда расмий мақомга эга бўлсагина ҳужжатлар масаласи енгиллашади. Демак, Россия ўз тилини босим қуролига айлантирди.

Володинга кўра, ҳозирда Қозоғистон, Беларус, Қирғизистон ва Тожикистон ҳайдовчилик гувоҳномалари Россияда чекловсиз амал қилади. Ушбу рўйхатга кирмаган давлатлар, хусусан Ўзбекистон ҳайдовчилик гувоҳномалари эса эндиликда Россия ҳудудида ҳақиқий кучга эга бўлмаслиги мумкин.

Ўзбекистон Россия қаршисида бўйин эгиб тил воситасида Россия ҳукмронлигини тан олмаса, фуқароларимиз Россияда транспорт бошқариш учун алоҳида тартибда имтиҳон топширишга мажбур бўлади. Бу эса юз минглаб меҳнат мигрантлари учун қўшимча вақт, маблағ ва ҳужжат ишлари дегани.

Ҳозир хат-саводи яхши, тил кўникмаси бор бўлган кўплаб ўзбекистонликлар меҳнат миграцияси учун Жанубий Корея, Европа иттифоқи, АҚШ ва Канадага йўл олади. Бу мамлакатларда маошлар анча юқори, меҳнат шарт-шароитлари яхши, инсон ҳуқуқлари кафолатланган. Россияда эса шовинизм урчиган, Россия жамияти мигрантларга «учинчи сорт» каби муносабатда бўлади. Россияда юз бераётган миллатчилик, ҳақорат ва зўравонлик ҳолатларининг видеолари кунда, кунора тарқалади.

Россия мигрантларга шарт-шароит, Европа ёки ривожланган Осиё мамлакатлари каби ойлик, инсон ҳуқуқлари таъминотини кафолатламайди, буни асло истамайди.

Шу ҳолига мигрантларни қалқон қилиб ҳар сафар Ўзбекистондан итоат талаб қилиши 90 йиллардаги «братва» муомаласини эслатяпти. Россия ҳукумати Ўзбекистонга нисбатан талаб ва босимни оширгани сари ўзининг қанчалар аламзада, ожиз эканини ошкор қилиб қўйяпти.