Ёзувчи Носир Фозилов вафот этди

13 январь куни Тошкентда таниқли ўзбек ёзувчиси Носир Фозилов 88 ёшида вафот этди. Адибни яқиндан билган кишилар унинг камтар ва хокисор бир одам бўлганини эслашади.

Носир Фозилов 1929 йили Чимкент вилоятининг Туркистон туманида туғилди. 1954 йили Тошкент давлат университетининг филология факультетини тамомлагач, «Гулхан» ва «Шарқ юлдузи» журналларида адабий ходим сифатида ишлади. 1984 йилдан эса Ғафур Ғулом номидаги адабиёт ва санъат нашриётида проза бўлимини бошқарди.

Ёзувчи «Шум боланинг набиралари», «Ирмоқ», «Қора хат», «Кўклам қиссалари» китоблари, «Оқсой» ва «Саратон» қиссалари билан танилди.

«Шум боланинг набиралари» асари учун Ғафур Ғулом мукофоти ва қозоқ адабиётидан ўзбек тилига таржималари учун Қозоғистон Ёзувчилар уюшмасининг Бейимбет Майлин номидаги мукофоти соҳиби бўлган.

«Элтуз» нашри марҳумнинг оила аъзолари, ҳамкасблари ва дўстларига таъзия билдиради.

Eltuz.com