Yozuvchi Nosir Fozilov vafot etdi

13 yanvar kuni Toshkentda taniqli o‘zbek yozuvchisi Nosir Fozilov 88 yoshida vafot etdi. Adibni yaqindan bilgan kishilar uning kamtar va xokisor bir odam bo‘lganini eslashadi.

Nosir Fozilov 1929 yili Chimkent viloyatining Turkiston tumanida tug‘ildi. 1954 yili Toshkent davlat universitetining filologiya fakultetini tamomlagach, «Gulxan» va «Sharq yulduzi» jurnallarida adabiy xodim sifatida ishladi. 1984 yildan esa G‘afur G‘ulom nomidagi adabiyot va san'at nashriyotida proza bo‘limini boshqardi.

Yozuvchi «Shum bolaning nabiralari», «Irmoq», «Qora xat», «Ko‘klam qissalari» kitoblari, «Oqsoy» va «Saraton» qissalari bilan tanildi.

«Shum bolaning nabiralari» asari uchun G‘afur G‘ulom mukofoti va qozoq adabiyotidan o‘zbek tiliga tarjimalari uchun Qozog‘iston Yozuvchilar uyushmasining Beyimbet Maylin nomidagi mukofoti sohibi bo‘lgan.

«Eltuz» nashri marhumning oila a'zolari, hamkasblari va do‘stlariga ta'ziya bildiradi.

Eltuz.com