Қуйичирчиқда ногирон аёлнинг боласи тортиб олинди

Қуйичирчиқ тумани Маданият маҳалласида яшовчи Нафосат Юсуфбоева қайнонаси ва эрининг тайзиқига учраб уйдан ҳайдалган. Қайнона ва эр Нафосатнинг икки яшар қизини тортиб олиб, учрашишга тўсқинлик қилмоқда.

Нафосат Юсуфбоева боласини қайтариб олиш мақсадида маҳалла, ички ишлар, туман ва вилоят фуқаролар судига, МИБ ва Республика хотин-қизлар қўмитасига мурожаат қилган.

Фуқаролар суди болани онада қолдириш ҳақида қарор чиқарди. Бироқ маҳаллий ИИБ, прокуратура ва МИБ суд ҳукмини ижро қилиш юзасидан ҳеч қандай ҳаракат амалга оширмаяпти.

Нафосат Юсуфбоева 2-гуруҳ ногирони, унинг қўлида бир яшар фарзанди қолган – тўнғич қизи билан эса саккиз ойдан бери кўришолмай сарсон.

Золим қайнона ва эр шантаж ва дўқ-пўписа билан давлат ижро органларини қўрқитиб, қизалоқни онасига қайтаришдан бош тортмоқда.

Ноилож қолган она фарзандини қайтаришда Омбудсман ва Тошкент вилоят ички ишлар бош бошқармасидан амалий ёрдам сўраяпти.