Ғазғонда ҳоким гранит эмас, тақдирларни тошга айлантираяпти

Ўзбекистон президенти халқ фаровонлиги, камбағалликка барҳам бериш ва ишсизликни йўқотиш учун куну-тун ҳаракат қилаётган бир пайтда, баъзи маҳаллий раҳбарлар аксинча йўл тутмоқда. Шу «ўзбошимчалик»нинг яққол намунаси — Ғазғон шаҳар ҳокими Жўраев Норали.

Тадбиркорлардан ҳомийлик ниқоби остида ресурс сўриб олиш, шантаж ва манфаат талашишгача борган бу амалдор ҳақида жонли фактлар бор.

Гап шундаки, Ғазғонда фаолият юритаётган “Мармар Обод” МЧЖ раҳбари ҳоким томонидан босим ва таҳдидлар остида қолган. Натижада корхона 6 минг квадрат метр гранит плитани “ҳомийлик асосида” топширишга мажбур бўлган.

Ушбу гранит плиталарнинг:

– 2500 м² қисми Ғазғон шаҳар йўлакларига ётқизилган;

– 3500 м² қисми эса ҳокимнинг ўзи туғилиб ўсган Қизилтепа тумани, Тошработ қўрғонидаги масжидга «ҳадя» қилинган.

Бу гранитнинг умумий қиймати тахминан 500 миллион сўм. Аммо эътибор беринг: бу ораларда “Мармар Обод” МЧЖда 160 нафар ишчи-ходимга бир неча ойдан бери маош берилмаяпти. Корхона пул йўқлигидан фаолиятини тўхтатди. 160 оила нонсиз қолди.

Инвестор жалб этиш, иш ўринлари яратиш керакми? Йўқ, ҳокимга кераги йўқ. Унинг эътибори ўз қишлоғига плиталар юборишда, ўз манфаатини кўзлашда. Пул? — Тадбиркордан. Ҳомийлик? — Қоғозда. Ишчилар? — Ўзини қутқариб олсин.

Бу расман коррупция. Бу — тўғридан-тўғри ваколатни суиистеъмол қилиш. Бу — халқ ҳисобидан ўзини тўйдириш.

Бундай ҳоким билан тегишли органлар шошилмасдан эмас, шошилиб шуғулланиши шарт.

160 нафар ишчи, уларнинг фарзандлари, келажаги тўғрисида ким ўйлайди?

Гранит плита учун оғир меҳнат қилганлар охири гўё «гранит тобут» ичида қолди.

Элтуз бу воқеани кузатиб боради. Ҳақиқатни гапиришдан тўхтамаймиз.

Агар сизда ҳам шундай ҳолатлар бўлса — бизга ёзинг. Суиқасдлар, шантаж ва сохта ҳомийликлар фош этилиши керак.