G‘azg‘onda hokim granit emas, taqdirlarni toshga aylantirayapti

O‘zbekiston prezidenti xalq farovonligi, kambag‘allikka barham berish va ishsizlikni yo‘qotish uchun kunu-tun harakat qilayotgan bir paytda, ba'zi mahalliy rahbarlar aksincha yo‘l tutmoqda. Shu «o‘zboshimchalik»ning yaqqol namunasi — G‘azg‘on shahar hokimi Jo‘raev Norali.

Tadbirkorlardan homiylik niqobi ostida resurs so‘rib olish, shantaj va manfaat talashishgacha borgan bu amaldor haqida jonli faktlar bor.

Gap shundaki, G‘azg‘onda faoliyat yuritayotgan “Marmar Obod” MChJ rahbari hokim tomonidan bosim va tahdidlar ostida qolgan. Natijada korxona 6 ming kvadrat metr granit plitani “homiylik asosida” topshirishga majbur bo‘lgan.

Ushbu granit plitalarning:

– 2500 m² qismi G‘azg‘on shahar yo‘laklariga yotqizilgan;

– 3500 m² qismi esa hokimning o‘zi tug‘ilib o‘sgan Qiziltepa tumani, Toshrabot qo‘rg‘onidagi masjidga «hadya» qilingan.

Bu granitning umumiy qiymati taxminan 500 million so‘m. Ammo e'tibor bering: bu oralarda “Marmar Obod” MChJda 160 nafar ishchi-xodimga bir necha oydan beri maosh berilmayapti. Korxona pul yo‘qligidan faoliyatini to‘xtatdi. 160 oila nonsiz qoldi.

Investor jalb etish, ish o‘rinlari yaratish kerakmi? Yo‘q, hokimga keragi yo‘q. Uning e'tibori o‘z qishlog‘iga plitalar yuborishda, o‘z manfaatini ko‘zlashda. Pul? — Tadbirkordan. Homiylik? — Qog‘ozda. Ishchilar? — O‘zini qutqarib olsin.

Bu rasman korruptsiya. Bu — to‘g‘ridan-to‘g‘ri vakolatni suiiste'mol qilish. Bu — xalq hisobidan o‘zini to‘ydirish.

Bunday hokim bilan tegishli organlar shoshilmasdan emas, shoshilib shug‘ullanishi shart.

160 nafar ishchi, ularning farzandlari, kelajagi to‘g‘risida kim o‘ylaydi?

Granit plita uchun og‘ir mehnat qilganlar oxiri go‘yo «granit tobut» ichida qoldi.

Eltuz bu voqeani kuzatib boradi. Haqiqatni gapirishdan to‘xtamaymiz.

Agar sizda ham shunday holatlar bo‘lsa — bizga yozing. Suiqasdlar, shantaj va soxta homiyliklar fosh etilishi kerak.