Микрокредитбанкда эркак ходимлардан 1 миллиард сўм ундирилди

2025 йил 14 августда “Микрокредитбанк” АТБ томонидан қабул қилинган ҳужжат асосида 1 миллиард сўм маблағ ходимлардан ундирилган. Расмийлаштирилган фармойишда бу қарор Ўзбекистон Республикаси Марказий банкининг 2025 йил 10 июндаги 712/2-сонли қарори ва июль ойидаги 23-26/28xdfu-сонли хатга асосан амалга оширилгани қайд этилган. Маблағ “Ходимларни бошқариш” (HR) департаменти тақдим этган рўйхатга асосан белгиланган ходимлардан ундирилиши кераклиги кўрсатилган.

Аммо ишончли манбаларга кўра, ушбу маблағ фақат эркак ходимлардан ундирилган. Бу ҳолат бир қанча савол ва шикоятларга сабаб бўлди. Айрим ходимларнинг таъкидлашича, улардан қонунан асосланмаган ҳолда катта суммадаги пул ушланган. 

Бундай жуда муҳим молиявий операция юзасидан банкнинг республика миқёсидаги бош бухгалтеридан аниқ жавоб олишнинг имкони бўлмаган. 

Маблағ ундиришнинг қай тартибда амалга оширилгани, у иш ҳақидан ушлаб қолинганми ёки алоҳида йиғим сифатида амалга оширилгани ҳақида ҳам аниқ маълумот йўқ. 

Ҳужжат расмий кўринишда бўлса-да, унинг амалда қандай бажарилгани шаффоф эмас. Шунингдек, эркак ходимларни танлаб олиш орқали ундириш амалиёти меҳнат қонунчилиги ва тенглик тамойилларига зид ҳисобланади.

Бу ҳолат “Микрокредитбанк”да маблағларнинг қандай асосда ундирилаётгани ва уларнинг қандай мақсадларда сарфланаётгани борасида жиддий саволлар туғдиради. 

Масаланинг ҳуқуқий ва молиявий томонларини ўрганиш учун тегишли органлар аралашуви талаб этилади. Чунки бир миллиард сўм каби катта миқдордаги маблағ устидан жамоатчилик назорати бўлиши шарт.