Педофилнинг қочишига йўл қўйган қамоқ қўриқчилари устидан иш очилди

Педофилнинг қочишига имкон яратиб берган Тошкент вилоятидаги тергов ҳибсхонаси ходимига нисбатан жиноят иши қўзғатилди. Натижада 31 ёшли маҳкум меҳнат фаолияти давомида манзил-колониядан қочиб кетиб, 3-синф ўқувчисини зўрлаган. Бу ҳақда Ижтимоий ҳимоя миллий агентлиги матбуот хизмати хабар берган эди.

Идоранинг маълум қилишича, ҳозирда жиноятчи ушланиб, ҳибсга олинган. Ҳолат юзасидан унга нисбатан Жиноят кодексининг 118-моддаси (Номусга тегиш) ва 119-моддаси 4-қисми (Ўн тўрт ёшга тўлмаган шахсга нисбатан жинсий эҳтиёжни зўрлик ишлатиб ғайритабиий усулда қондириш) билан жиноят иши қўзғатилган.

Шунингдек, мутахассислар ҳозирда жабрланган қизга бирламчи тиббий ёрдам кўрсатилаётганини маълум қилди. У билан психолог ишламоқда.  Агентлик ишни ўз назоратига олганини таъкидламоқда.  Вояга етмаган жабрланувчининг ҳуқуқлари, психологик ва ижтимоий ҳимоясини таъминлаш мақсадида мутахассислар томонидан “Инсон” ижтимоий хизматлар маркази вакилларидан иборат ишчи гуруҳ тузилган.

Шунингдек, ИИВ ҳузуридаги Жазони ижро этиш департаменти бош тергов ҳибсхонасининг интизомий бўлинмаси қоровули ва бошқаларга нисбатан 214-модда 3-қисми “в” банди (Давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг бир гуруҳ шахслар томонидан олдиндан тил бириктириб, моддий қимматликлар олиши ёки мулкий манфаатдор бўлиши) билан жиноят иши қўзғатилган.

Эслатиб ўтамиз, воқеа 16-октябрь куни Оҳангарон туманида содир бўлганди. Эркак 50-сонли манзил-колониядан меҳнат фаолияти давомида қочиб кетиб, 3-синф ўқувчисини зўрлаган. Шундан сўнг жиноятчи далада маҳаллий аҳоли томонидан қўлга олинган. У 2018 йилда Жиноят кодексининг 118-моддаси (Ўн тўрт ёшга тўлмаган шахсни зўрлаш) 4-қисми билан 16 йилга, 2033 йилгача озодликдан маҳрум қилинган. Суднинг 2024 йил августдаги қарори билан у қолган 9 йил 2 ой 19 кунлик жазо муддатини ўташ учун манзил колониясига ўтказилган.