Pedofilning qochishiga yo‘l qo‘ygan qamoq qo‘riqchilari ustidan ish ochildi

Pedofilning qochishiga imkon yaratib bergan Toshkent viloyatidagi tergov hibsxonasi xodimiga nisbatan jinoyat ishi qo‘zg‘atildi. Natijada 31 yoshli mahkum mehnat faoliyati davomida manzil-koloniyadan qochib ketib, 3-sinf o‘quvchisini zo‘rlagan. Bu haqda Ijtimoiy himoya milliy agentligi matbuot xizmati xabar bergan edi.

Idoraning ma'lum qilishicha, hozirda jinoyatchi ushlanib, hibsga olingan. Holat yuzasidan unga nisbatan Jinoyat kodeksining 118-moddasi (Nomusga tegish) va 119-moddasi 4-qismi (O‘n to‘rt yoshga to‘lmagan shaxsga nisbatan jinsiy ehtiyojni zo‘rlik ishlatib g‘ayritabiiy usulda qondirish) bilan jinoyat ishi qo‘zg‘atilgan.

Shuningdek, mutaxassislar hozirda jabrlangan qizga birlamchi tibbiy yordam ko‘rsatilayotganini ma'lum qildi. U bilan psixolog ishlamoqda.  Agentlik ishni o‘z nazoratiga olganini ta'kidlamoqda.  Voyaga yetmagan jabrlanuvchining huquqlari, psixologik va ijtimoiy himoyasini ta'minlash maqsadida mutaxassislar tomonidan “Inson” ijtimoiy xizmatlar markazi vakillaridan iborat ishchi guruh tuzilgan.

Shuningdek, IIV huzuridagi Jazoni ijro etish departamenti bosh tergov hibsxonasining intizomiy bo‘linmasi qorovuli va boshqalarga nisbatan 214-modda 3-qismi “v” bandi (Davlat organi, davlat ishtirokidagi tashkilot yoki fuqarolarning o‘zini o‘zi boshqarish organi xizmatchisining bir guruh shaxslar tomonidan oldindan til biriktirib, moddiy qimmatliklar olishi yoki mulkiy manfaatdor bo‘lishi) bilan jinoyat ishi qo‘zg‘atilgan.

Eslatib o‘tamiz, voqea 16-oktyabr kuni Ohangaron tumanida sodir bo‘lgandi. Erkak 50-sonli manzil-koloniyadan mehnat faoliyati davomida qochib ketib, 3-sinf o‘quvchisini zo‘rlagan. Shundan so‘ng jinoyatchi dalada mahalliy aholi tomonidan qo‘lga olingan. U 2018 yilda Jinoyat kodeksining 118-moddasi (O‘n to‘rt yoshga to‘lmagan shaxsni zo‘rlash) 4-qismi bilan 16 yilga, 2033 yilgacha ozodlikdan mahrum qilingan. Sudning 2024 yil avgustdagi qarori bilan u qolgan 9 yil 2 oy 19 kunlik jazo muddatini o‘tash uchun manzil koloniyasiga o‘tkazilgan.