Ҳазораспда номаълум ширкат асфальт йўлни бузмоқда

Хоразм вилояти Ҳазорасп тумани марказида канализация ўтказиш баҳонасида марказий кўчалар вайрон этилмоқда, деб хабар берди Элтуз манбаси.

Ҳазораспликлар сўзларига кўра, Наманган вилоятидан келган номаълум пудратчилар ҳеч қандай техникаси, малакаси ёки ҳужжати бўлмаган ҳолда Ҳазорасп шахарчасининг яқинда асфальтланган асосий йўлларини ковлаб, ичимлик суви қувурларини ёриб, алоқа кабелларига зарар етказмоқда.

Маълумотларга кўра, Ҳазорасп, Ғафур Ғулом ва Эрик Гаязов кўчаларининг ўртасидан 30 сантиметрлик канализация қувури ётқизиш учун 1,5–2 метр кенгликдаги ўралар қазилган. Жараён қурилиш стандартларига ҳам, лойиҳа талабларига ҳам жавоб бермайди.

Аҳоли таъкидлашича, йўлнинг ҳар икки тарафида 4–5 метр бўш ерлар бўлишига қарамай, қувурлар айнан автомобил катнови қисмида қазилмоқда. Бу ҳаракат хавфсизлиги, одамлар ҳаёти ва экологияга хатар солаётгани айтилмоқда.

Ҳазораспликлар ишлар тартибсиз, назоратсиз ва “хоҳлаганча” олиб борилаётганини, натижада янгиланган йўллар қайта бузилиб, шаҳарча “ағдар-тўнтар” бўлаётганини билдирмоқда.

Аҳоли Президент Администрациясини вазиятга дарҳол аралашишни сўраб, лойиҳа тўхтатилиши ва халқ билан маслаҳатлашган ҳолда янги, стандартларга мос лойиҳа ишлаб чиқилишини талаб қилмоқда.