Hazoraspda noma'lum shirkat asfalt yo‘lni buzmoqda

Xorazm viloyati Hazorasp tumani markazida kanalizatsiya o‘tkazish bahonasida markaziy ko‘chalar vayron etilmoqda, deb xabar berdi Eltuz manbasi.

Hazoraspliklar so‘zlariga ko‘ra, Namangan viloyatidan kelgan noma'lum pudratchilar hech qanday texnikasi, malakasi yoki hujjati bo‘lmagan holda Hazorasp shaxarchasining yaqinda asfaltlangan asosiy yo‘llarini kovlab, ichimlik suvi quvurlarini yorib, aloqa kabellariga zarar yetkazmoqda.

Ma'lumotlarga ko‘ra, Hazorasp, G‘afur G‘ulom va Erik Gayazov ko‘chalarining o‘rtasidan 30 santimetrlik kanalizatsiya quvuri yotqizish uchun 1,5–2 metr kenglikdagi o‘ralar qazilgan. Jarayon qurilish standartlariga ham, loyiha talablariga ham javob bermaydi.

Aholi ta'kidlashicha, yo‘lning har ikki tarafida 4–5 metr bo‘sh yerlar bo‘lishiga qaramay, quvurlar aynan avtomobil katnovi qismida qazilmoqda. Bu harakat xavfsizligi, odamlar hayoti va ekologiyaga xatar solayotgani aytilmoqda.

Hazoraspliklar ishlar tartibsiz, nazoratsiz va “xohlagancha” olib borilayotganini, natijada yangilangan yo‘llar qayta buzilib, shaharcha “ag‘dar-to‘ntar” bo‘layotganini bildirmoqda.

Aholi Prezident Administratsiyasini vaziyatga darhol aralashishni so‘rab, loyiha to‘xtatilishi va xalq bilan maslahatlashgan holda yangi, standartlarga mos loyiha ishlab chiqilishini talab qilmoqda.