Трамп устидан «102»га арз қилган ўзбек жаримага тортилди

Тошкент шаҳрининг Бектемир туманида яшовчи фуқаро маст ҳолатда ички ишлар органларига қўнғироқ қилиб, АҚШ президенти Дональд Трамп устидан шикоят қилди. Бу ҳақда суд ҳужжатларига таяниб маҳаллий нашрлар хабар бермоқда.

Жорий йилнинг январь ойи бошида 1988 йилда туғилган фуқаро А.К. маст ҳолатда «102» рақамига қўнғироқ қилган. У диспетчердан Дональд Трампга нисбатан чора кўришни ва ариза қабул қилишни талаб қилган. Эркакнинг иддаосига кўра, Трамп Венесуэла президенти Николас Мадурони ўғирлаб кетган.

Суҳбат давомида оператор ундан яшаш манзилини сўраганида, фуқаро «Оқ уйда яшайман» деб жавоб берган.

Мазкур ҳолат юзасидан қўзғатилган маъмурий иш Бектемир тумани судида кўриб чиқилди. Судда ҳуқуқбузар ўз айбига тўлиқ иқрор бўлди ва ўша вақтда жуда маст бўлгани сабабли нима деганини эслай олмаслигини билдирди.

Суд қарорига кўра фуқаро Маъмурий жавобгарлик тўғрисидаги кодекснинг 199-моддаси (Махсус хизматларни қасддан алдаб чақириш) билан айбдор деб топилди. Унга базавий ҳисоблаш миқдорининг 3 баравари, яъни 1 230 000 сўм (тахминан 100 доллар) миқдорида жарима жазоси тайинланди.