Tramp ustidan «102»ga arz qilgan o‘zbek jarimaga tortildi

Toshkent shahrining Bektemir tumanida yashovchi fuqaro mast holatda ichki ishlar organlariga qo‘ng‘iroq qilib, AQSh prezidenti Donald Tramp ustidan shikoyat qildi. Bu haqda sud hujjatlariga tayanib mahalliy nashrlar xabar bermoqda.

Joriy yilning yanvar oyi boshida 1988 yilda tug‘ilgan fuqaro A.K. mast holatda «102» raqamiga qo‘ng‘iroq qilgan. U dispetcherdan Donald Trampga nisbatan chora ko‘rishni va ariza qabul qilishni talab qilgan. Erkakning iddaosiga ko‘ra, Tramp Venesuela prezidenti Nikolas Maduroni o‘g‘irlab ketgan.

Suhbat davomida operator undan yashash manzilini so‘raganida, fuqaro «Oq uyda yashayman» deb javob bergan.

Mazkur holat yuzasidan qo‘zg‘atilgan ma'muriy ish Bektemir tumani sudida ko‘rib chiqildi. Sudda huquqbuzar o‘z aybiga to‘liq iqror bo‘ldi va o‘sha vaqtda juda mast bo‘lgani sababli nima deganini eslay olmasligini bildirdi.

Sud qaroriga ko‘ra fuqaro Ma'muriy javobgarlik to‘g‘risidagi kodeksning 199-moddasi (Maxsus xizmatlarni qasddan aldab chaqirish) bilan aybdor deb topildi. Unga bazaviy hisoblash miqdorining 3 baravari, ya'ni 1 230 000 so‘m (taxminan 100 dollar) miqdorida jarima jazosi tayinlandi.