«Жаҳон тан олган таълим тизими» ўзбекка нима берди?

Мустақилликнинг 25 йиллик тўйи олдидан бошланган ура-ура мақолалар орасидан «Халқ сўзи»да чоп этилган «Тараққиётимизнинг асосий мезони» тўғрисидаги лавҳа ҳам ўрин олган.

Унда «юртбошининг раҳнамолиги»да  яратилган Кадрлар тайёрлаш миллий дастури ва унинг самараси ўлароқ, «дунё тан олган» Ўзбекистон таълим тизимининг кўз кўриб, қулоқ эшитмаган «ютуқлари» ҳақида ҳикоя қилинади.

Мақолада 12 йиллик мажбурий ҳамда бепул таълим яратилгани тўғрисида гапиралади. Аммо болани сал нуфузлироқ мактабга ёки лицейга жойлаштириш учун нега пул тўланиши, металл пули, обуна пули, макалатура пули, мактабни таъмирлаш пули каби «пул бер, пул берлар» ҳақида негадир гапирилмайди.

Бунинг ўрнига: «Президентимиз Ислом Каримов раҳнамолигида Кадрлар тайёрлаш миллий дастурининг ҳаётга муваффақиятли татбиқ этилиши натижасида ҳаётимизда ижобий ўзгаришларга – ижтимоий-сиёсий иқлим барқарорлиги ҳамда халқимиз онгу тафаккурида янгиланишларга эришилди», дея сиёсат қилинади.

Бу ҳам етмагандек, яна таълим соҳасида ҳам миллий модель яратилгани даъво қилинади ва у «собиқ тузум мафкураси асоратларидан тамомила халос этиш»ни асосий мақсад қилиб олгани таъкидланади.

Эътиборлиси, Кадрлар тайёрлаш миллий дастури кўп жиҳатдан ўзини оқламагани, ёшлар ўқиш ўрнига «дангасалик»ка маҳкум бўлиб, яқин хорижга пул ишлашга кетишга мажбур экани, таълим муассасаларида давомат ҳам, ўқитиш сифати ҳам пастлиги ва тизимдаги бошқа муаммолар умуман тилга олинмайди.

Ёки муаллифнинг ҳақиқатни айтмоқчи бўлган тилига тушов солинганми, деган савол ўртага чиқади. Балки шундайдир. Яна ким билади дейсиз!

Eltuz.com