Фарғона Олий ўқув юртларида пахта терими боис ўқиш тўхтатилди

19 сентябр куни Фарғона вилоятидаги Олий ўқув юрти талабаларига пахта терими муносабати билан ўқиш тўхтатилгани билдирилиб, тушликда уйларига кетишга рухсат берилди.

20 сентябр эрталабдан вилоятдаги барча олий ўқув юрти талабалари пахта теримига жўнаб кетиши маълум қилинди.

Пахта терадиган этак ҳам теримчи ҳисобидан

«Элтуз» мухбири суҳбатлашган яна бир талаба вилоят марказидан узоқда яшашини билдиради. Унинг сўзларига кўра эрталаб ўқишга келишганида бу гап йўқ эди. Иккинчи парадан чиқишганидан сўнг гуруҳ рахбари кириб, «Ҳозир ҳамма уй-уйига кетаверсин, эртага соат 7 дан кечикмасдан пахтага кетадиган бўлиб келинглар!», деган.

«Вақтдан ютиш учун йўлдаёқ аямга телефон қилдим. Аям Қўқон буюм бозорига бориб турдилар. Биргалашиб бозор қилдик. Бўз матосининг бир метри 3-3,5 минг сўм. Этак қилиб тикилгани 5-5,5 минг сўмдан сотилаяпти. Уйда тикув машинамиз бор. Ўзимиз тикиб олаверамиз, деган ниятда бўз олдик» дейди у.

Кўрпа-тўшак билан келиш айтилган

Қўқон педагогика институти талабаларига ҳам 20 сентябрдан пахтага чиқиш буюрилди.

Институт рахбарларидан бирининг «Элтуз» мухбирига билдиришича, талабаларга эрталаб соат 6.30да институт биноси олдига келиш айтилган.

«Талабалар ўзлари билан каравот, кўрпа-тўшак, идиш-товоқ олишлари керак», деди у.

Пахтадан қолиш нархи 250 доллар

Талабалардан бири «Элтуз» мухбтирига, 250 доллар эвазига пахтадан қолиш мумкинлигини билдирди.

«Аммо оиламиз шароити 250 доллар беришни кўтармайди. Опам, мен, синглим талаба. Мен ва опам контрактда ўқиймиз. Дадам давлат ишида ишлайди, ундан ташқари деҳқончилик ҳам қилишади. Шунинг учун пахтага боришга мажбурман», дейди у.

Унинг сўзларига кўра, опас ва синглиси ҳам эртага пахтага жўнаб кетишади. Уч опа сингилнинг пахтага тайёрланишлари учун 100 доллардан ошиқроқ маблағ кетган.

«Ҳатто қуруқ чойгача олдик. Сабаби пахта пайтида баъзан қуруқ чой йўқлиги учун оддий қайнаган сув ичишга ҳам мажбур бўлиб қоламиз» деди у.

Қўқон педагогика институти талабалари вилоятнинг Фурқат ва Данғара туманларида пахта теришади.

Насима Даврон қизи
Eltuz.com