Farg‘ona Oliy o‘quv yurtlarida paxta terimi bois o‘qish to‘xtatildi

19 sentyabr kuni Farg‘ona viloyatidagi Oliy o‘quv yurti talabalariga paxta terimi munosabati bilan o‘qish to‘xtatilgani bildirilib, tushlikda uylariga ketishga ruxsat berildi.

20 sentyabr ertalabdan viloyatdagi barcha oliy o‘quv yurti talabalari paxta terimiga jo‘nab ketishi ma'lum qilindi.

Paxta teradigan etak ham terimchi hisobidan

«Eltuz» muxbiri suhbatlashgan yana bir talaba viloyat markazidan uzoqda yashashini bildiradi. Uning so‘zlariga ko‘ra ertalab o‘qishga kelishganida bu gap yo‘q edi. Ikkinchi paradan chiqishganidan so‘ng guruh raxbari kirib, «Hozir hamma uy-uyiga ketaversin, ertaga soat 7 dan kechikmasdan paxtaga ketadigan bo‘lib kelinglar!», degan.

«Vaqtdan yutish uchun yo‘ldayoq ayamga telefon qildim. Ayam Qo‘qon buyum bozoriga borib turdilar. Birgalashib bozor qildik. Bo‘z matosining bir metri 3-3,5 ming so‘m. Etak qilib tikilgani 5-5,5 ming so‘mdan sotilayapti. Uyda tikuv mashinamiz bor. O‘zimiz tikib olaveramiz, degan niyatda bo‘z oldik» deydi u.

Ko‘rpa-to‘shak bilan kelish aytilgan

Qo‘qon pedagogika instituti talabalariga ham 20 sentyabrdan paxtaga chiqish buyurildi.

Institut raxbarlaridan birining «Eltuz» muxbiriga bildirishicha, talabalarga ertalab soat 6.30da institut binosi oldiga kelish aytilgan.

«Talabalar o‘zlari bilan karavot, ko‘rpa-to‘shak, idish-tovoq olishlari kerak», dedi u.

Paxtadan qolish narxi 250 dollar

Talabalardan biri «Eltuz» muxbtiriga, 250 dollar evaziga paxtadan qolish mumkinligini bildirdi.

«Ammo oilamiz sharoiti 250 dollar berishni ko‘tarmaydi. Opam, men, singlim talaba. Men va opam kontraktda o‘qiymiz. Dadam davlat ishida ishlaydi, undan tashqari dehqonchilik ham qilishadi. Shuning uchun paxtaga borishga majburman», deydi u.

Uning so‘zlariga ko‘ra, opas va singlisi ham ertaga paxtaga jo‘nab ketishadi. Uch opa singilning paxtaga tayyorlanishlari uchun 100 dollardan oshiqroq mablag‘ ketgan.

«Hatto quruq choygacha oldik. Sababi paxta paytida ba'zan quruq choy yo‘qligi uchun oddiy qaynagan suv ichishga ham majbur bo‘lib qolamiz» dedi u.

Qo‘qon pedagogika instituti talabalari viloyatning Furqat va Dang‘ara tumanlarida paxta terishadi.

Nasima Davron qizi
Eltuz.com