Музейлар бошқармаси лавозими сотилганми?

Маданий мерос агентлигига қарашли Музейлар бошқармаси раҳбари лавозими учун эълон қилинган танлов ҳақиқий шаффофликдан йироқ экани ҳақида таҳририятимизга мурожаат келиб тушди. Мурожаатчи ишончли манбаларга таяниб, ушбу лавозим  аллақачон “сотиб бўлинган”, танлов эса фақат расмий кўриниш учун ўтказилаётганини иддао қилади.

Маълумотга кўра, танловда иштирок этаётган номзодлар бир неча марта синовларни муваффақиятли топшириб, суҳбат босқичигача етиб келган. Лекин, саволларга тўлиқ, 100% жавоб берган тақдирда ҳам, уларга «танловдан ўта олмадингиз» дея номаълум сабаблар билан рад жавоби берилмоқда. Кейин эса ушбу лавозим яна қайтадан АРГОС тизими орқали эълон қилинаётгани кузатилмоқда.

“Сабаби — бу ўрин аллақачон маълум шахсга ва маълум суммага “бронь” қилинган. Фақатгина ўша “ишончли” номзод дастлабки тест босқичидан ўта олмаяпти. У шунгагина етиб олса, суҳбатдан уни суяб ўтказишади”, — дейди манба.

Мурожаатчи ҳолатни фош этиш мақсадида Давлат хавфсизлик хизмати ёки Коррупцияга қарши курашиш агентлигини танлов жараёни бўйича видеоязувларни таҳлил қилишга чақирмоқда.

“Суҳбат босқичида қатнашган барча номзодлар видеоёзуви бор. Шу ёзувлар таҳлил қилинса, кимнинг қандай жавоб бергани, кимнинг қандай баҳолангани очиқ кўринади. Ҳаммаси ойдинлашади,” — деб ёзади у.

Бу каби «танлов»лар адолатли рақобатни ўлдиради, салоҳиятли кадрларни давлат хизматидан узоқлаштиради ва жамиятда давлат идораларига бўлган ишончни йўқотади.

Элтуз таҳририяти Маданий мерос агентлиги, Коррупцияга қарши кураш агентлиги ҳамда бошқа масъул идоралардан ушбу ҳолат бўйича расмий изоҳ кутади.