Muzeylar boshqarmasi lavozimi sotilganmi?

Madaniy meros agentligiga qarashli Muzeylar boshqarmasi rahbari lavozimi uchun e'lon qilingan tanlov haqiqiy shaffoflikdan yiroq ekani haqida tahririyatimizga murojaat kelib tushdi. Murojaatchi ishonchli manbalarga tayanib, ushbu lavozim  allaqachon “sotib bo‘lingan”, tanlov esa faqat rasmiy ko‘rinish uchun o‘tkazilayotganini iddao qiladi.

Ma'lumotga ko‘ra, tanlovda ishtirok etayotgan nomzodlar bir necha marta sinovlarni muvaffaqiyatli topshirib, suhbat bosqichigacha yetib kelgan. Lekin, savollarga to‘liq, 100% javob bergan taqdirda ham, ularga «tanlovdan o‘ta olmadingiz» deya noma'lum sabablar bilan rad javobi berilmoqda. Keyin esa ushbu lavozim yana qaytadan ARGOS tizimi orqali e'lon qilinayotgani kuzatilmoqda.

“Sababi — bu o‘rin allaqachon ma'lum shaxsga va ma'lum summaga “bron” qilingan. Faqatgina o‘sha “ishonchli” nomzod dastlabki test bosqichidan o‘ta olmayapti. U shungagina yetib olsa, suhbatdan uni suyab o‘tkazishadi”, — deydi manba.

Murojaatchi holatni fosh etish maqsadida Davlat xavfsizlik xizmati yoki Korruptsiyaga qarshi kurashish agentligini tanlov jarayoni bo‘yicha videoyazuvlarni tahlil qilishga chaqirmoqda.

“Suhbat bosqichida qatnashgan barcha nomzodlar videoyozuvi bor. Shu yozuvlar tahlil qilinsa, kimning qanday javob bergani, kimning qanday baholangani ochiq ko‘rinadi. Hammasi oydinlashadi,” — deb yozadi u.

Bu kabi «tanlov»lar adolatli raqobatni o‘ldiradi, salohiyatli kadrlarni davlat xizmatidan uzoqlashtiradi va jamiyatda davlat idoralariga bo‘lgan ishonchni yo‘qotadi.

Eltuz tahririyati Madaniy meros agentligi, Korruptsiyaga qarshi kurash agentligi hamda boshqa mas'ul idoralardan ushbu holat bo‘yicha rasmiy izoh kutadi.