Бурсада жиянини гаровга олиб, опасини пичоқлаган ўзбек қўлга олинди

Ўзбекистон фуқароси Меҳрали П. полиция амалиёти чоғида қўлга олинди. Тўрт соат давом этган кўндириш ишларидан сўнг у таслим бўлди.

Туркиянинг Бурса шаҳрида 5 кун аввал жиянини гаровга олиб, опасини пичоқ билан яралаган ҳолда қочиб кетган Ўзбекистон фуқароси Меҳрали П. (26) бугун оиласининг уйига келган пайтида полиция томонидан ўтказилган амалиёт натижасида қўлга олинди. Полицияни кўргач, эшикни қулфлаб олган ва балконда қўлида пичоқ билан ўзига зарар етказган гумонланувчи, ходимлар томонидан кўндирилиб, қўлга олинди.

31 декабрь куни қамоқхонадан рухсат билан чиққан Ўзбекистон фуқароси Меҳрали П., бир кундан сўнг опаси Н.П. (32)нинг Йилдирим тумани Акчағлаян маҳалласи, 1-инчи Ўзлюже кўчасидаги уйига борган. Н.П. укасининг гиёҳванд модда истеъмол қилаётганидан шубҳаланиб, уни онасининг уйига юборишни истаган. 

Опасига жаҳли чиққан Меҳрали П. ошхонадан нон пичоғини олиб, жияни Б.Г. (3)ни гаровга олган. Укасига аралашмоқчи бўлган Н.П. қўлидан яраланган. Опасининг жароҳат олганини кўрган Меҳрали П. жиянини қўйиб юбориб, қочиб кетган. Шифохонага борган Н.П. даволанишдан сўнг укасидан шикоят қилган. Шундан сўнг ҳуқуқ-тартибот органлари Меҳрали П.ни қўлга олиш бўйича иш бошлаган.

4 СОАТДАН КЕЙИН ТАСЛИМ БЎЛДИ

 Меҳрали П. айнан шу кўчада яшовчи оиласининг уйига боргани ҳақида маълумот олган ходимлар соат 12:00 атрофида манзилга етиб борган. Полицияни қаршисида кўрган Меҳрали П. квартира эшигини қулфлаб, таслим бўлишдан бош тортган. Пичоқ олиб балконга чиққан гумонланувчи ўзига зарар етказа бошлаган. Шундан сўнг манзилга ўт ўчирувчилар, тиббиёт ходимлари ва Махсус ҳаракатлар полицияси чақирилган. Тахминан 4 соат давом этган кўндириш ишларидан сўнг Меҳрали П. ҳаракатларини тўхтатиб, полиция назорати остида тиббиёт ходимларига топширилган.

Ҳодиса бўйича тергов давом этмоқда.