Mirziyoevning farmoni haybarakallachi deputatlarni faollashtirdi

O‘zbekiston prezidenti vazifasini bajaruvchi Shavkat Mirziyoevning «Tadbirkorlik faoliyatining jadal rivojlanishini ta'minlashga, xususiy mulkni har tomonlama himoya qilishga va ishbilarmonlik muhitini sifat jihatdan yaxshilashga doir qo‘shimcha chora-tadbirlar to‘g‘risida»gi farmoni bu boradagi quruq gap-so‘zlarning yangi to‘lqinini boshlab berdi.

O‘zbekistondagi barcha nashrlar mazkur farmonga turli toifadagi kishilar munosabatlarini e'lon qilishga tushib ketdi.

Farmonning «muhim ahamiyati», uning tadbirkorlik faoliyatini «dunyo mezonlari bo‘yicha rivojlantirishga zamin yaratishi» aytilmoqda.

Har doimgidek, farmonga munosabat bildirishga parlament deputatlari juda faolligi sezilib turibdi. Deyarli har bir gazetada birorta deputatning bu boradagi maqolasini o‘qish mumkin.

Xususan, «Adolat» gazetasi (07.10) orqali chiqish qilgan «Adolat» SDPning Qonunchilik palatasidagi fraktsiyasi a'zosi Qodir Jo‘raev farmonni sharhlar ekan: «…deputatlar ushbu farmon mazmun-mohiyatini keng jamoatchilikka yetkazishda, unda belgilangan keng ko‘lamli chora-tadbir va ustuvor yo‘nalishlarni ro‘yobga chiqarishda nihoyatda tashabbuskor va faol bo‘lishi talab etilishi»ni ta'kidlaydi.

Deputatning XDP fraktsiyasidan bo‘lgan hamkasbi Yoqub Umarov esa «O‘zbekiston ovozi» gazetasidagi (08.10) chiqishida bu farmondan «o‘roqda yo‘q, mashoqda yo‘q, xirmonda hozir» partiyasining manfaatlari yo‘lida foydalanib qolishga harakat qiladi.

«…mazkur farmon partiyamiz saylovoldi dasturida belgilangan qator vazifalar amalga oshishiga, o‘z ishini yo‘lga qo‘yish niyatidagi elektoratimiz vakillarining intilishini yanada kuchaytirishga xizmat qiladi», deydi sobiq kommunistik partiya merosxo‘ri bo‘lgan deputat.

Yuqorida tilga olganimiz kabi farmonlar Islom Karimov davrida ham behisob chiqarilgan. Deputatlar ham ularni «tarixiy hujjat» deya baholab, son-sanoqsiz chiqishlar qilgan. Lekin bu «tarixiy hujjatlar» suvga tushgan toshdek yo‘qolib, faqat qog‘ozda qolib ketgani bugun hech kimga sir emas.

Ha aytgancha, yangi farmon bahonasida e'lon qilingan chiqishlar eski «tarixiy hujjatlar» chiqqan vaqtda chop etilgan munosabatlarning aynan o‘zidir. Faqat bunda farmonning nomi o‘zgargan, xolos…

Bahodir Sharif
O‘zbekistonlik gazetxon tahallusi
Eltuz.com