Kredit olib bergich deputat va yong‘oqning foydasi

Deputatlar ham kutib turgan ekan shekilli, prezidentning faol bo‘ling, degan topshirig‘idan keyin bel bog‘lab xalq bilan ham tillashishga tushib ketdi. Har holda partiyalarning nashrlarini ko‘zdan kechirsangiz, shunday taassurot uyg‘onadi.

Xususan, «Milliy tiklanish» gazetasi (8.02) shu nomdagi demokratik partiyadan xalq deputatlari Denov tumani kengashiga aylangan deputatning tinib-tinchimay, «xalq dardi bilan yashayotgani» haqida hikoya qiluvchi maqola e'lon qildi.

«Bugungi deputatning ish kabinetida o‘tirmay, xalq ichida ko‘proq bo‘lishi juda muhim», deya qo‘riq ochgan bu deputat opa yaqinda bir uchrashuvda mahalla faollaridan biri unga issiqxona qurish uchun kredit olishga yordam so‘raganini bildirgan.

Deputat ham erinmay uchrashuv ishtirokchilariga bankdan kredit olish uchun nimalar qilish kerakligi haqida ma'lumotlar beribdi.

Maqola muallifiga ham qoyil, kredit olish uchun deputatga emas, bankka murojaat etish kerakligini eslatmay qo‘ya qolgan. Agar shunday qilganida deputatning «faolligi»ni shubha ostiga qoldirishi mumkin edi-da.

Ko‘p bora kuzatganimizdek, prezident bir gap aytsa, labbaychilarning oshig‘i olchi bo‘ladi. Hammani tovuqboqarlikka chorlayotgan davlat rahbari yaqinda yong‘oq va bodom ekib, daromad qilish masalasiga ham to‘xtalgandi.

«Qishloq hayoti» gazetasi (8.02) bunga labbay deb javob berib, qishloq xo‘jaligi fanlari nomzodining «yong‘oq ming yil daromad berishi» haqidagi maqolasini e'lon qildi.

«Prezidentimiz Shavkat Mirziyoevning mutasaddi rahbarlar bilan uchrashuvlari hamda aholi bilan muloqotida yong‘oq mevali bog‘larni ko‘paytirish borasidagi fikrlari mohiyatida ezgu niyat mujassamdir», deyiladi maqolada.

Olimlarimiz ham qiziq. Ertaga prezident mabodo, deylik, akatsiya haqida yaxshi gaplar gapirib qolsa, ular shu daraxtni ekishdan ko‘zlangan «ezgu niyatlar» to‘g‘risida maqolalarni qatorlashtirib tashlaydimi?!

Bahodir Sharif
O‘zbekistonlik gazetxon tahallusi
Eltuz.com