UzLiDep tadbirlari «avvalgilarga o‘xshamas»mi?

«XXI asr» gazetasi (06.04) o‘z muassisi bo‘lmish partiya – O‘zLiDePning «avvalgilardan farqli tadbirlari endi ko‘pchilikda katta qiziqish uyg‘otayotgani»ni bildirdi.

Bu «katta qiziqish»ga sabab sifatida «tadbirlar shakl va mazmun jihatdan tobora takomillashib, tom ma'nodagi ochiq muloqotlar, davra suhbatlari tusini olayotgani» ekani aytib o‘tiladi.

Biz so‘nggi vaqtlarda ko‘paygandan ko‘payib borayotgan, aslida xalqning og‘irini yengil qilish uchun emas, balki hisobot uchun o‘tkazilayotgandek taassurot uyg‘otayotgan bu tadbirlarni yoritish asnosida e'lon qilinayotgan ayrim raqamlarga e'tibor qaratishni ma'qul ko‘rdik.

Partiyaning Toshkent shahar kengashi o‘tkazgan davra suhbati haqida yozgan gazeta o‘tgan yili poytaxtda tashkil etilgan 7492 ta kichik biznes va tadbirkorlik sub'ektidan 4285 tasi tugatilganini ma'lum qiladi.

E'tibor qiling-a, kichik biznes va tadbirkorlikni rivojlantirish iqtisodiyot taraqqiyoti va jamiyat yangilanishining asosiy yo‘nalishi sifatida ko‘rilayotgan mamlakatning birgina hududida ahvol shunchalik darajada yomon.

Hukumatning balandparvoz va'dalari qanotida bir yil davomida tashkil etilgan biznes sub'ektlarining qariyb 60 foizi ishlay olmay, darhol sinib ketgani aslida mamlakatdagi biznes muhiti abgor ekanidan darak bermaydimi?

Ammo gazeta bu raqamni keltirganidan so‘ng ahvolni «silliqlab» o‘tishning yo‘lini topganiga qoyil qolish kerak.

«Bu raqamlar, garchi yurtimizda xususiy biznes uchun g‘oyat qulay shart-sharoit yaratilgan bo‘lsa-da, tadbirkorlarning bilim va ko‘nikmalari yetarli emasligidan… dalolat beradi», deydi muallif.

Tadbirkorlar partiyasi o‘z elektoratini aybdor qilganidan sal yuzi qizargan shekilli, masalaning asl sabablari qatoriga «ishbilarmonlar duch kelayotgan muammolarni bartaraf etishga oid yondashuvlar, uslublar yaxshi samara bermayotgani»ni ham sanab o‘tishga majbur bo‘lgan.

Shuningdek, partiya turli tadbirlar o‘tkazish orqali «tuman hokimliklari bilan birgalikda 52 ta xususiy firma faoliyati qayta tiklangani»ni g‘urur bilan tilga oladi.

4 mingdan ziyod singan tadbirkorning 52 tasiga ishini tiklashga yordam berganidan iftixor etayotgan partiyaga shon-sharaflar yo‘llaylikmi yoki shu partiya asosida shakllangan hukumatning biznesga yo‘l bermayotganini tanqid qilaylikmi?

Bahodir Sharif
O‘zbekistonlik gazetxon tahallusi
Eltuz.com