Ko‘prikni nega chet elliklarga qurdiramiz?

Bundan bir qancha vaqt avval ayrim mahalliy saytlar “Jahon” axborot agentligi xabariga tayangan holda Belgiyaning Victor Buyck Steel Construction (VBSC) kompaniyasi Toshkentda 23 ta piyodalar yerusti ko‘prigi qurishi haqida xabar tarqatdi.

Ma'lum bo‘lishicha, loyiha O‘zbekiston delegatsiyasining may oyida Bryusselga tashrifi doirasida taqdim etilgan.

Maqolada VBSC ijrochi direktori Pit Ferxayen bir necha oy avval Toshkentga tashrif buyurgani, o‘zbek hamkasblari piyodalar yerusti ko‘priklarini qurish bo‘yicha loyihani ko‘rib chiqishni taklif etganini aytgani bayon qilingan.

Eng qizig‘i, kun.uz sayti Toshkent shahri hokimligi masala bo‘yicha savolni javobsiz qoldirganini yozgan.

Agar masalaga chuqurroq qaralsa, o‘zbek quruvchilari Toshkentda ajoyib piyodalar ko‘priklarini qurgani, shu kunlarda yana qurayotgani e'tiborga olinsa, qiziq fikrlar uyg‘onishi mumkin.

Piyodalar ko‘prigi qurish quruvchi tashkilotga bir marta foyda keltiradi. Quruvchi pulni oladi, ko‘prikni quradi, shu bilan ketdi.

Ya'ni undan foydalanish quruvchi tashkilotga boshqa foyda keltirmaydi. Zero, ko‘prikdan foydalanish bepul.

Asosiy savollar shu o‘rinda tug‘iladi. Nega o‘zimizda ko‘prik qurishning hadisini olgan tashkilotlar bor bo‘lgan bir paytda chet elliklar xizmatidan foydalanishga ehtiyoj tug‘ildi?

Nega ko‘prik qurilishi uchun valyutada pul to‘lab, chet el kompaniyasini jalb etishimiz kerak? Yoki ular biznikilardan yaxshiroq quradimi?

Biznes markazlar, tijorat maqsadidagi katta-katta qurilishlarga xorijiy kompaniyalarni jalb etish kerakligi o‘z-o‘zidan tushunarli. Ular shunga mablag‘ ham tikadi, ya'ni investitsiya kiritadi, chunki bu qurilishlar kelajakda foyda keltiradi.

Albatta, Toshkent shahri hokimligi piyodalar ko‘priklarini qurish bo‘yicha xorijlik sheriklar bilan qanday shartlarda kelishuvga borayotgani bizga qorong‘u.

Agar gap yangi texnologiyalar haqida borayotgan bo‘lsa, bu texnologiyalarni o‘zimizning mutaxassislar o‘rganishini ta'minlab, zamonaviy texnologik uskunalarni xarid qilishga nima xalaqit beradi?

Axir xarid qilingan texnologiyalar, avvalo, o‘zimizda qolib, keyin ham xizmat qiladi-ku!

Zero, pulimiz bor ekanki, chet elliklarga qurdirmoqchimiz ko‘priklarni. Har holda ular tekinga qurmasa kerak?!

Mana shunday savollarga amaldorlar ochiq-oshkora javob bermay turgan bir paytda mutasaddilar o‘zimizning qo‘limizdan keladigan ish uchun chet elliklarga pul to‘lamoqchi bo‘layotganini tushunish ancha qiyin.

Shunday emasmi?

Bahodir Sharif
Eltuz.com