Nodirjon Jo‘raev o‘z arizasiga binoan ishdan bo‘shagan

“Eltuz” sayti Toshkentdagi manbalariga asoslanib, oldingi haftada Davlat aktivlarini boshqarish agentligi direktori Nodir Jo‘raev Davlat xavfsizlik xizmati xodimlari tomonidan o‘z xonasida ushlangani, uning xonasidan hujjatlar olib ketilgani haqida xabar tarqatgan edi.

Shundan so‘ng o‘zini Nodirjon Jo‘raev deb tanishtirgan shaxs “Eltuz” bilan bog‘lanib, bu xabarlar noto‘g‘ri ekanini, u sog‘lig‘i tufayli o‘z arizasiga binoan ishdan bo‘shaganini ma'lum qildi.

Avvalo, agar bu ma'lumot noto‘g‘ri bo‘lsa, “Eltuz” uzr so‘ragan holda ayrim mulohazalarni ham bildiradi.

Jumladan, yaqindagina lavozimiga tayinlangan yuqori lavozimli mulozimning bunchalik tez ishdan bo‘shatilishi jamiyatda turli savollarni keltirib chiqarishi tabiiydir. Ikkinchi tomondan, jamiyatning qiziqishi hisobga olingan holda bu haqda ma'lumot taqdim etilmagani ham ajablanarlidir.

Hatto mahalliy matbuotda e'lon qilingan va tegishli doiralardan olingani iddao qilingan  xabarlarda ham mulozimning nega ishdan bo‘shagani haqida shaffof ma'lumotlarning yo‘qligi, ajabmaski, turli mish-mishlarni tug‘diradi.

Shuning uchun “Eltuz” nashri yana bir bor uzr so‘ragan holda O‘zbekistondagi hozirgi kunda chechak ochayotgan demokratik o‘zgarishlarni qo‘llab-quvvatlashini bildiradi va hukumatni yanada ochiqroq bo‘lishga da'vat etadi.

Eltuz.com