Mustaqillik kuni Toshkentda davlat bayroqlari o‘g‘irlandi

Mustaqillik bayrami nishonlangan 1 sentyabr kechasi, Toshkent rasmiylariga ko‘ra, shahar ko‘chalariga o‘rnatilgan bayroqlardan 2000 tadan ortig‘i o‘g‘irlangan. Yetkazilgan zarar miqdori 142,6 mln so‘mni tashkil etdi, deya xabar berdi gazeta.uz nashri poytaxt hokimligi matbuot xizmati ma'lumotidan iqtibos keltirib.

Ijtimoiy tarmoqlarda noma'lum shaxslarning simyog‘ochga osig‘liq bayroqni o‘g‘irlayotgani, bir guruh yigitlarning mashinalariga bayroq osib, yo‘l harakati qoidalarini buzgan holda ko‘chada tiqin hosil qilib «bayram qilayotgani» aks etgan videolar tarqaldi.

«Bizdan narida «Spark», ichidan bitta chuvak tushdi va tezgina simyog‘ochga maymun kabi osilib, u yerdan ikkita bayroqni yulib oldi. Besh metr narida mentlarning mashinasi turardi va mentlarning emotsiyasi nol edi», deya yozdi Feliks ismli feysbuk yuzeri.

1 sentyabr kuni kuzatilgan bu kabi holatlarni tarmoqda ko‘pchilik tasdiqladi.

«Bu esidan ayrilganlar tuni bo‘yi mashinalariga bayroq osib, to‘da-to‘da bo‘lib yurishdi. Mening go‘dak o‘g‘lim kechasi vahimadan chinqirib uyg‘ondi. Agar ular patriot bo‘lishsa, bayroqlarini ko‘tarib jimgina yurishmaydimi, nima keragi bor hammaning tinchini buzib, uyqu bermasdan», deya yozdi yana bir feysbuk yuzeri Diana Berkutova.

Boshqa bir yuzer Ramil Valiev esa bu oddiy o‘g‘irlik ekanini iddao qildi.

«Bu o‘g‘irlik. Davlat mulkini o‘marish. Buning uchun tuzukina «muddat» olish mumkin», deya izohladi voqeani Ramil Valiev feysbuk sahifasida.

Hukumat nashrlariga ko‘ra, har bir bayroqning narxi 70 ming so‘mni tashkil etadi. Shunday qilib, bir kechada davlatga yetkazilgan zarar miqdori 142,6 mln so‘mga yetgan.

Rassom Tuz
Eltuz.com