Mirziëev chetdagi muxolifatni O‘zbekistonga kiritmoqchi emas

«Internetda muxolifat masalasi muhokama qilinyapti. U qanday foyda keltirgan?» — dedi Shavkat Mirziyoev Al-Xorazmiy nomidagi maktabda 27 dekabr kuni yoshlar bilan uchrashuvda. 

Savol tug‘iladi: «Siz Bosh vazir bo‘lgan paytingizda Xitoy va Rossiyaga o‘zbek gazi sotilib, odamlarning uylariga gaz olib boruvchi quvurlar yillar davomida kesildi. Bundan xalq qanday foyda ko‘rdi? 

Prezident Karimovning qizi Gulnora Karimova ikki milliard dollarni o‘mardi. 

Lola va Temur Tillaevchi? Bu yebto‘ymas juftlik mamlakatga tovarlar importini yakka o‘zi monopoliya qilib, millionlab dollar soliq va bojxona yig‘imlarini to‘lamadi.

Qamoqda yotgan sobiq bosh prokuror Rashid Qodirov qancha o‘mardi? 

MXX generali Haët Sharifxo‘jaevchi? Sobiq bosh prokuror va DXX rahbari Otabek Murodov va Ixtiër Abdullaevlarchi? 

Sudya Nizom Rustamov odamlarni o‘limga hukm qilmaslik uchun 20 ming dollar pora olganida xalqqa manfaat keltirgandimi?  

MXX jallodi Nodir To‘raqulov kichik go‘daklarni o‘ldirganida kimga foyda keltirdi? 

Kuëvingiz Otabek Umarov 100 ming dollarga gladiator Habib Nurmagomedov maykasini sotib olganida xalqqa foyda keltirdimi?

Umuman, sizning atrofingizdagilar qanday foyda olib keldi vatanga, janob prezident?

O‘zbekiston manfaatlari Rossiya foydasi yo‘lida xarj qilinaëtgani foydami?

Karimov davrida O‘zbekiston tashqarisiga quvilgan «Birlik» lideri doktor Abdurahim Po‘latov siz jim bo‘lib turgan paytda prokurorlarni «kalamush», jim rozi turgan ommani «qoramol» deb atagan edi. Mana, siz deyarli har kuni shu odamning gapini takrorlayapsiz. 

Muhammad Solih 2005 yilda O‘zbekiston bilan Tojikiston o‘rtasidagi mina maydonlarini tozalash haqida gapirgan paytda siz o‘sha minalarni joylashtirish ishiga bosh vazir sifatida rahnamolik qilmaganmidingiz?

O‘rtoq prezident, siz komsomol o‘tmishingizda muxolifatning keragi yo‘q, degan zararli tushunchani miyangizga singdirgansiz. To‘g‘ri, Shimoliy Koreya va Turkmanistonda muxolifat yo‘q. Eritreyada ham yo‘q. Ammo AQSh, Yevropada, siz maqtab og‘zingizdan bol tomgan Germaniyada muxolifat bor. Muxolifat mamlakat tashqarisida bo‘ladimi ëki ichkarisidami, millat uchun zarur. 

Eltuz.com