Taniqli hofiz koronavirusga chalinib olamdan o‘tdi

Taniqli hofiz Rustam Hojimamedov Samarqandiy 6 aprel kuni AQShning Nyu-York shahrida koronavirusdan o‘lgani haqida yaqinlari ma'lum qildi.

«Qurbon o‘lam» qo‘shig‘ini qiëmiga yetkazib aytadigan betakror hofiz 51 ëshda edi.

AQShga 2008 yilda kelgan bu xonanda restoranlarda qo‘shiq aytib yurgan.

“O‘zbekistonning Nyu-York shahridagi bosh konsulxonasi ma'lumotiga ko‘ra, 2020 yil 6 aprel kuni 1969 yilda tug‘ilgan O‘zbekiston fuqarosi R.X. koronavirus infektsiyasini yuqtirib olish natijasida mahalliy klinikada vafot etdi”, deyiladi Tashqi ishlar vazirligi 7 aprel kuni tarqatgan rasmiy ma'lumotda.

Vazirlikning bildirishicha, 22 mart kuni marhumda kasallikning birinchi alomatlari qayd etilgan edi, uning sog‘lig‘i keskin yomonlashishi munosabati bilan 2 aprel kuni u kasalxonaga yotqizilib, o‘pkani sun'iy shamollatish apparatiga ulangan va sun'iy komaga tushirilgan. Ushbu davrda bosh konsulxona uning qarindoshlari bilan doimiy aloqada bo‘lib turgan.

Vazirlik ma'lumotida bosh konsulxona diasporal tashkilotlar rahbarlari va faollari bilan birgalikda uning dafn marosimiga bog‘liq tashkiliy masalalarni hal qilish bilan shug‘ullanayotgani ta'kidlangan.

AQShda yashovchi, asli o‘zbekistonlik bo‘lgan ijtimoiy tarmoq foydalanuvchilarining yozishlaricha, bir necha kun avvalroq ham Nyu-York shahrining Bruklin tumanida ikki o‘zbekistonlik koronavirus oqibatida olamdan o‘tgandi.

Bundan oldin Shvetsiyada ham O‘zbekistonning bir vatandoshi koronavirus yuqtirgani bois o‘lgan edi. «Eltuz»ning bir-biridan mustaqil manbalar orqali aniqlashicha, Shvetsiyada o‘lgan shaxs o‘rta yoshlardagi kelib chiqishi samarqandlik o‘zbekdir.

Ayni paytda Shvetsiyada koronavirusga chalingan kamida yana o‘n nafar o‘zbekistonlik borligi aytilmoqda. Ular orasida Shvetsiyada qochqinlik maqomida yashayotgan tarmoq faoli Muqimjon Mahmudov ham bor. Muqimjon Mahmudov 7 aprelga kelib sog‘lig‘i ancha yaxshi bo‘lib qolgani haqida xabar qoldirdi.

Shvetsiya Yevropa mamlakatlari orasida keskin karantin rejimi o‘rnatmagan davlat sifatida mahalliy va xalqaro nashrlar tomonidan tanqid ostiga olinmoqda.

Ayni paytda Rossiyada yashaydigan taniqli inson huquqlari faoli Bahrom Hamroev ham koronavirus yuqtirgani bois mahalliy klinikada davolanmoqda.

«Eltuz»ga ma'lum bo‘lishicha, AQShda yashayotgan o‘zbekistonliklar Nyu-Yorkda 6 aprelda vafot etgan hofiz Rustam Hojimamedov oilasiga moliyaviy ko‘mak yig‘ishmoqda.

Eltuz.com