Voyaga yetmagan qizni zo‘rlaganlikda gumonlanayotgan yigit qamoqqa olindi

Toshkent viloyatining O‘rtachirchiq tumanida istiqomat qiluvchi 14 yoshli M.R.ni bir necha marta tahqirlab, zo‘rlaganlikda ayblanayotgan A.X. qamoqqa olindi. Holat bo‘yicha “Eltuz” maqola e'lon qilgan edi.

“Eltuz”ga taqdim etilgan ma'lumotlarga ko‘ra, yigit ayni vaqtda ehtiyot chorasi sifatida qamoqqa olingan. Qizning otasi R.D. ishning yana jimgina yopilib ketishidan cho‘chimoqda. 

Ma'lum bo‘lishicha, yigit 25 mart sanasidan boshlab tergov ishlariga ayblanuvchi sifatida jalb qilingan. 

“Arizamga ko‘ra, O‘rtachirchiq tumani prokuraturasi tomonidan 2020 yil 30 sentyabrda Jinoyat kodeksining 128-moddasi 1-qismi bilan jinoyat ishi qo‘zg‘atilgandi, – deydi ota. – Bu tuman ichki ishlar bo‘limi tergov bo‘limiga ham yuborilgan edi. 

Surishtiruv bo‘yicha ayblanuvchining shaxsi aniqlanmagani uchun ish 2020 yil 30 oktyabrda JPKning 1-qismi 1-bandiga asosan to‘xtatilgandi. Orada shuncha yugurdim. Murojaat qilmagan kishim qolmadi. Xalqaro saytlarga chiqishga majbur bo‘ldim. 

2021 yil 13 fevraldan jinoyat ishi bo‘yicha tergov harakatlari ochilgan bo‘lsa-da, ishlar sust borayotgan edi. Hozir A.X. Jinoyat-protsessual kodeksining 227-moddasi tartibida ushlanib, joriy yilning 25 mart sanasidan boshlab ayblanuvchi sifatida Jinoyat kodeksining 118-moddasi 3-qismi “a” bandi bilan tergov jarayonlarida ishtirok etmoqda. 

Bu ishni shaxsan Senat raisi Tanzila Norboeva nazorat qilib turibdi, deyishyapti. Ishga mulozimlar sovuqqonlik bilan qaramaydi, degan umiddaman”.

Ayblanuvchi yigitning yaqin qarindoshi “Eltuz” bilan suhbatda qizning otasi ulardan pul talab qilgani, bermaganlaridan so‘ng ijtimoiy tarmoqlarda chiqishlar qilib, o‘z maqsadiga erishishga harakat qilayotganini bildirdi. 

“Biroq qizning shu vaqtgacha nima ishlar qilib yurganini ko‘plar bilmaydi, –  dedi ayblanuvchining qarindoshi. – Dadasi Rossiyada ishlab yurganda uning tarbiyasi buzilib bo‘lgan edi. Yarim kechalari mahalla nozirining xonasiga kirib ketganini ko‘rgan guvohlar bor. 

Jiyanim qizning holatidan xabardor bo‘lgan. Jiyanim bilan ilk uchrashganidan roppa-rosa bir oy oldin qiz 7 iyun kuni yigitlar bilan daryoga cho‘milgani borgan va o‘sha yerda ular bilan jinsiy aloqada bo‘lgan. 

Ikki safar ham qiz jiyanimning mashinasiga o‘z ixtiyori bilan chiqqan. Ularning asl maqsadi jiyanimni qamash emas, aksincha, nimadir undirib olish edi. Chunki qizning otasi bu bo‘yicha bir necha marotaba turli takliflar bilan chiqqan. Qonunchilik bu tomonni ham o‘rganishini talab qilardim”.

Eltuz.com