Umida Niyozovaga huruj qilgan sharafsizning tanobi tortilsin!

Farg‘ona viloyatidagi va umuman vodiydagi barcha professional jurnalist va ziëlilarga ikki og‘iz gapim bor.

Vodiy azaldan mehmondo‘stligi bilan tanilgan.

Chetdan kelgan odamning ëqasidan olib «obonchilik» qilish, «shantaj» va kimlargadir ëllanib kelgan mehmonni atay obro‘sizlantirish harakatlari va pogrom vodiylikka yarashiq ish emas.

Farg‘ona viloyatida o‘ziga bloger deb nom qo‘yib olgan g‘irt savodsiz va tuban bir yaratiq Shuxrat Esonov Germaniyadan Farg‘onadagi jurnalist Sharifa Madrahimovaning uyiga atay mehmon bo‘lib kelgan Umida Niëzovani haqorat va sazoyi qilgani fakti juda uyat ish bo‘ldi.

Huquqni himoya qiluvchi organlar bu «pogrom»ga huquqiy baho beradi.

Lekin ma'naviy jihatdan Farg‘ona jurnalistlari va xalqini uyatga qo‘ygan bu sharafsizga nasihat qilish va haddini bildirish viloyat ziëlilari zimmasidagi vazifa deb bilaman.

Umida Niëzovaga qilingan pogrom yuzasidan Germaniya Tashqi ishlar vazirligi va O‘zbekiston agrar sohasiga investitsiya kiritishga oid xalqaro tashkilotlar tashvish bildirdi.

Bu sharafsiz «bloger» O‘zbekiston prezdidentining paxta majburiy mehnatiga barham berish bo‘yicha qilgan ishlarini shubha ostiga qo‘yib xalqaro darajada mamlakat imidjini ëmonlashishiga «hissa» qo‘shdi.

Bunga stop deyish joiz. Buloq boshidagi itning o‘ligi kabi barcha ichadigan suvni bulg‘amasin.

Qadim va mehmondo‘st Farg‘ona ziëlilarining bu vaziyatdan jiddiy xulosa chiqarishiga ishonaman.

Eltuz Bosh muharriri Qudrat Bobojon