«Askiya Siti»dagi qurilish maydonida bir shaxs halok bo‘ldi

18 fevral kuni Toshkent shahri Yakkasaroy tumanidagi “Askiya Siti”dagi nolegal qurilish maydonida yana bir fojia sodir bo‘ldi.

Ma'lumotlarga ko‘ra, shaxsi noma'lum erkak taxminan 35-40 yoshlarda bo‘lib, na qurilish xodimi, na mahalliy aholi vakili ekani aniqlangan.

Hodisa taxminan soat 15:00 atrofida sodir bo‘lgan. Halok bo‘lgan fuqaro kotlovanga tushib ketgani va o‘sha yerda halok bo‘lgani aytilmoqda.

Hodisa joyiga tez yordam brigadasi yetib kelgan, ammo ular uning hayotini saqlab qola olishmagan. Shuningdek, ichki ishlar va prokuratura xodimlari ham voqea joyida ish olib bormoqda.

Ma'lumotlarga ko‘ra, mazkur kotlovan noqonuniy ekani va sud tomonidan uni ko‘mish haqida qaror chiqarilgani ta'kidlangan.

Shunga qaramay, qurilish bilan bog‘liq shaxslar kotlovanni yopmagan va aksincha, yer uchastkalari hujjatlari bor deb, odamlarga sotishda davom etgan.

“Askiya Siti”dagi noqonuniy qurilish 2018 yildan beri bahsli holatda qolmoqda. Muammoli hududda qurilish ishlari davom etgani va bu kabi firibgarlik sxemalari orqali fuqarolardan pul olib kelinayotgani aytiladi.

Hech bir davlat idorasining bu holatga ta'sir o‘tkaza olmayotgani, odamlar uysiz qoladimi yoki hayotdan ko‘z yumadimi, bunday guruhlarga farqi yo‘qligi haqida mahalliy manbalar gapirmoqda.

Hozircha hodisa yuzasidan rasmiy izoh berilmagan.