KITOB TUMANIDA HOKIM YoRDAMChISI PIChOQLAB O‘LDIRILDI

2025 yil 19 iyun kuni kechqurun Qashqadaryo viloyati Kitob tumani Yangiobod mahallasi hokim yordamchisi Samadov Farrux pichoqlab o‘ldirildi. Uning janozasi 20 iyun kuni tushlik payti o‘tkazildi.

Ma'lumotlarga ko‘ra, voqea kecha kechqurun mahalliy kafeda sodir bo‘lgan. Samadov Farrux u yerda hamkasblari va bir necha qassob tadbirkorlar bilan uchrashgan, yeb-ichish paytida janjal kelib chiqqan va natijada hokim yordamchisi pichoqlab o‘ldirilgan.

Hozirda hodisa bo‘yicha huquqni muhofaza qiluvchi organlar tergov ishlarini boshlaganlar.

Aytishlaricha, Samadov Farrux pichoqlangan paytda Kitob tumanidagi barcha rahbarlar, ichki ishlar xodimlari va profilaktika inspektorlari Shahrisabz shahri va Miraki shaharchasida o‘tkazilayotgan Prezident tashrifiga tayyorgarlik tadbirlariga jalb etilgan bo‘lgan. Shu bois, Kitob tumanida qonun ustuvorligini ta'minlovchi mutasaddilar bo‘lmagan.

Mahalliy aholi bu holatdan tashvishda. Ular Prezidentdan Kitob tumaniga ham tashrif buyurishlarini so‘rashmoqda.

Shuningdek, yaqinda Kitob tumani Charmgar mahallasi profilaktika inspektori G‘aniev Hikmat fuqaroning ishini sudga olib chiqmaslik evaziga 500 dollar pora olayotgan paytida qo‘lga olingan edi. U bir haftadan buyon hibsda saqlanmoqda.

Kuzatuvchilar fikricha, tumanda nazoratning susayishi katta muammolarga olib kelmoqda.