TO‘RTKO‘LNI ChIGIRTGA BOSDI

O‘zbekistonda shu yil chigirtkalar uchun barakali yil bo‘ldi. Bunday barakadan to‘rtko‘lliklar ham bahra olishmoqda.

Aytishlaricha, chigirtkalar kunduzi meva-cheva, dehqonchilik mahsulotlarini yeb bitirib, tunda chiroq yonidagi odamlar dasturxonlariga hujum qilmoqda. Mahalliy aholi chigirtkalarga qarshi kurashishda ojizlik qilmoqda.

Ayni paytda O‘zbekistonda chigirtkaga qarshi bepul dorilar tarqatilmoqda. Qashqadaryo, Surxondaryo va Samarqand viloyatlarida chigirtkalarga qarshi kimyoviy tozalash ishlari allaqachon o‘tkazilgan bo‘lsa, hozir Jizzaxda ham dorilash boshlangan.

Mutaxassislar chigirtka bilan zararlanish haqida O‘simliklar karantini va himoyasi agentligiga xabar berishni so‘ramoqda.

“O‘simliklaringizni chigirtkalarga yem qilib qo‘ymang” degan mazmunda xabarlar tarqalgan. Ammo aftidan bu yordam to‘rtko‘lliklarga yetib bormagan ko‘rinadi.

– Mas'ullar bunga ko‘z yummoqda. Chigirtkalarga qarshi hatto tekin dori u yoqda tursin pulga ham dori topolmayapmiz. Dehqonchilik ishlari ham orqaga ketdi. Mevalarni ham chigirtkalar yeb bitirdi,

– deydi Eltuz suhbatlashgan to‘rtko‘llik dehqon.