BUXORO VILOYaT PROKURATURASI MILLIARDLIK KORRUPTsIYa JINOYaTIGA NYeGA KO‘Z YuMDI?

«Buxoroneftegazparmalash»da milliardlik korruptsiya mojarosi yuzaga keldi. Jamiyat rahbariyati 2,85 milliard so‘m mablag‘ni sohta shartnomalar vositasida o‘zlashtirib yuborgan. Dastlab «KOGON MARS PLYS» MChJ bilan dizel va kompressor uskunalarni ta'mirlash bo‘yicha shartnoma tuzilgan. Biroq amalda ta'mirlash ishlari yo arzon bahoda sexlarda bajarilgan, yoki umuman bajarilmagan. Holatni Iqtisodiy jinoyatlarga qarshi departament xulosalari ham tasdiqlaydi. Foto va yozma dalillar, ish boshida turganlarning tushuntirish xatlari ham bor.

Talon-toroj to‘liq fosh etilgan bo‘lsa-da, jinoyat ishi 2025 yil 16 mayda yopib yuborildi. 

«Tergov ishlariga CAT dizellari bo‘yicha muhandislar, neft-gaz texnik nazorat inspektsiyalari va boshqa mutasaddi idoralar jalb etilmagan. Kompressorlar haqida allaqanday soliqchi mutaxassis va zavod bosh mexanigi xulosa berishgan. Tergovchi dalillarga tayanib jinoyat ishini olib borish o‘rniga – uskunalar ta'mirlanganmi o‘zi degan tor savolga yopishib olgan» – deydi insayder

Bir tomondan jamiyat rahbari Bakaev Baxtiyor Mirzaevich va «KOGON MARS PLYS» rahbari bir-biriga qarindosh. Boshqa tomondan jinoyat ishi Qorovulbozor tumani prokuraturasiga yuborilgani shubhali. Shikoyatchilarga ko‘ra bu tuman prokuraturasida mahalliy tanish-bilishchilik qonunlardan ustivor. 

«Buxoro viloyat prokuraturasi holatni tashqi audit bilan baholashga qaror qildi. “PROMSTROY-AUDIT” deb nomlangan xususiy tashkilot audit tekshiruvini jamiyatning o‘zidan olingan hujjatlar asosida olib borib 6 million so‘mga «chiroyli xulosa» yozib berdi», – deydi shikoyatchilardan biri.

Aftidan, «Buxoroneftegazparmalash» tergovning ostidan kirib, ustidan chiqdi. Jamiyat rahbariyati auditorlardan tortub, tergovchiyu, prokurorlar bilan kelishuvga erishdi – natijada, 2,85 milliard so‘mlik kamomad jinoyati muvaffaqiyatli bosdi-bosdi qilindi.