Bolgariyada 22 yoshli yigit suvga cho‘kib o‘ldi

Bolgariyaning Sozopol shahrida do‘stlari bilan cho‘milishga borgan 22 yoshli o‘zbek talaba suvda cho‘kib o‘ldi.

Yigitning tanasi bahaybat qoyatoshlar orasiga tiqilib qolgan va uni chiqarib olishning imkoni bo‘lmayapti. Bolgariya qutqaruv xizmati xodimlari ayni paytda cho‘kib ketgan kishini suvdan chiqarib olishning iloji yo‘qligini bildirgan.

O‘zbekiston Tashqi ishlar vazirligi matbuot kotibi Ahror Burhonov ham holat yuzasidan munosabat bildirdi.

“Mamlakatimiz fuqarosining Bolgariyaning Sozopol shahrida vafot etganligi haqidagi xabarni chuqur qayg‘u bilan qabul qildik. Marhumning oila a'zolariga chuqur hamdardligimizni bildiramiz”, deydi u.

Qayd etilishicha, ushbu ma'lumot kelib tushishi bilan, Bolgariya Respublikasini qamrab oluvchi O‘zbekistonning Istanbuldagi Bosh konsulxonasi bilan darhol aloqa o‘rnatilgan.

 Hozirda diplomatlar marhumning yaqinlari hamda Bolgariyaning tegishli davlat idoralari vakillari bilan hamkorlikda ishlamoqda. Vaziyat yuzasidan barcha zarur chora-tadbirlar ko‘rilmoqda.