Qo‘qonda qalbaki pul savdosi bilan shug‘ullangan yigit qo‘lga olindi

9 avgust kuni Qo‘qon shahar IIB xodimlari tomonidan o‘tkazilgan tezkor tadbirda 2003 yilda tug‘ilgan mahalliy yigit qalbaki pul muomalasi bilan shug‘ullanayotgan paytida qo‘lga olindi.

Tergov ma'lumotlariga ko‘ra, u 50 million so‘mlik qalbaki kupyurani «shartli haridor»ga haqiqiy 8 million so‘mga sotmoqchi bo‘lgan. Shu zahotiyoq ashyoviy dalillar bilan ushlangan.

Tadbir davomida uning uyi ham ko‘zdan kechirilib, 50, 100 va 200 ming so‘mlik jami 315,5 million so‘m hamda 100 AQSh dollarlik 120 ming dollar miqdoridagi qalbaki kupyuralar topildi va musodara qilindi. Yigitning yolg‘iz jinoyatga qo‘l urmagani, bu ishning ortida o‘nlab kishi borligi gumon qilinmoqda. 

Hozirda jinoyat ishi qo‘zg‘atilib, qalbaki pullarni unga yetkazib bergan shaxslarni aniqlash bo‘yicha tergov harakatlari olib borilmoqda.