Farg‘onada ham paxta kampaniyasi boshlandi

«Eltuz» nashrining Farg‘ona viloyatidagi manbalariga ko‘ra, tumanlarning uzoq hududlarida o‘qituvchi, shifokor va talabalardan tarkib topadigan terim otryadlari uchun yotoq joylari, non va oziq-ovqat mahsulotlari tayyorlab qo‘yilgan.

Maqolaning audio versiyasini tinglash:

«Bu yil o‘qituvchi va shifokorlar paxtaga chiqarilmaydi, deyilgan edi. Ammo asosiy ishchi kuchi – byudjet tashkiloti xodimlari», – dedi «Eltuz» muxbiri suhbatlashgan Farg‘ona viloyati hokimligida ishlovchi xodim.

Uning so‘zlariga ko‘ra, tez kunlarda o‘qituvchi va shifokorlar ommaviy ravishda terimga jalb etiladi. Shuningdek, viloyatdagi beshta oliy o‘quv yurti – Farg‘ona politexnika instituti, Qo‘qon pedagogika instituti, Farg‘ona davlat universiteti, TATU Farg‘ona filiali, TTA Farg‘ona filiallari talabalariga ham tayyor bo‘lib turish aytilgan.

Qo‘qon pedinstituti talabalari ham startda turishibdi. Ular haftaning oxirigacha ketishlari mumkin.

Universitet o‘qituvchilaridan birining «Eltuz» muxbiriga aytishicha, fakultetlarda ayrim kurs talabalari qolib o‘qishni davom ettirishi kerak.

Biroq bu hozircha aniq emas, ular 4 yoki 1-kurs talabalari bo‘lishi mumkin. Shuningdek, ommaviy paxta terimiga olib ketiladigan aniq kun va muddat ham noma'lum.

«Hozircha bir nima deya olmayman, direktorimiz baribir paxtaga chiqishimizni aytdi. Chunki cho‘l zonalarida terimchi-hasharchilar uchun allaqachon joy hozirlangan», – dedi maktab o‘qituvchilaridan biri.

«Eltuz» muxbiri suhbatlashgan muallimaning hokimlikda ishlaydigan turmush o‘rtog‘i ham bu yil o‘qituvchi va shifokorlar paxtaga chiqarilishini aytgan.

Shuningdek, Farg‘ona tumanlaridan birining tibbiyot birlashmasi rahbarining xo‘jalik ishlari bo‘yicha o‘rinbosari so‘zlariga ko‘ra, bu yerda avgust oyi oxirida yig‘ilish o‘tkazilgan.

«O‘shanda shifokorlar va o‘qituvchilar paxtaga chiqmaydi, deyishgandi. Ammo 7 sentyabr kuni yana katta yig‘ilish bo‘ldi va biz cho‘l zonasiga birinchi terim uchun 200 nafar xodim berishimiz kerakligi haqida topshiriq oldik. O‘sha kuni borib, yotoqdagi sharoitni ko‘rib keldik. Men zavxoz sifatida ikki kunda bir marta 200 kishiga 50 dona buxanka olib borishim kerak. Boshqa masalliqlar 15-20 kunga yetarli qilib qo‘yildi. Paxta yog‘i, makaron, guruch, tomat pastasi, shakar, mosh, loviya, yorma, no‘xat. O‘tgan yilgidek, fermer hasharchilarning tushligini qilib beradi. Nonushta va kechki ovqat tibbiyot birlashmasi hisobidan bo‘ladi», dedi xo‘jalik mudiri.

Nasima Davron qizi
Eltuz.com