Pochtaning yeb yutilgan pullari yosh operator bo‘yniga ilindimi?

O‘zbekiston pochtasining Namangan filiali shahar pochta aloqa bog‘lamasida operator bo‘lgan Baxramjanova Musallamxon Saloxitdin qizi deyarli 153 million so‘mni talon-toroj qilganlikda ayblandi.

Ushbu mablag‘ fuqarolarning kommunal to‘lovlari, pochta xizmati uchun to‘lovlaridan shakllangan. Operator Baxramjanova kunlik hisobotlarga jami 9 ming 634 dona to‘lov chekini ilova qilmagan deyiladi sud hujjatlarida. To‘lovlar esa asosan naqd pulda bo‘lgani uchun, pul kelib tushganini elektron tasdiqlash imkonsiz.

Ayblanuvchining o‘zi har kunlik hisobot va tushumni hisobchiga va kassirga topshirgani, ba'zi hollarda chek ilova qilishni unitgan bo‘lishi mumkinligini ta'kidladi. Biroq sud hujjatlari hisobchi Oybekning ham, kassir A'zamjoning ham kamomadga aloqadorligini tasdiqlamadi.

Kamomad aynan operator sabab yuzaga kelganini aloqa bog‘lamasi rahbari tasdiqlab ko‘rsatma berdi. Uning so‘zlariga ko‘ra, operator kunlik hisobotlarga naqd pul to‘lovlari cheklarini palapartish ilova qilgan. 9 mingdan ortiq chek yetishmayapti va shu cheklar ortidagi naqd pul to‘lovi ham kirim qilinmagan.

Shu asosda 28 yashar operator – Baxramjanova Musallamxon Saloxitdin qizi talon-torojda aybdor deb topildi. 153 million so‘m kamomadning 27 millioni Musallamxondan undirildi. Qolgan kamomad mablag‘ni to‘lab berish sharti qo‘yildi.

Shuningdek, Namangan shahar sudi hukmi bilan pochta operatori Baxramjanova Musallamxon Saloxitdin qizi 2 yilga ozodlikdan mahrum qilindi.