Namanganda «Ekipaj taksi»dagi qarindosh-urug‘chilik ortidan tekshiruv boshlandi

Transport nazorat inspektsiyasining Namangan viloyati hududiy bo‘limi 1069 «Ekipaj taksi» agregatorining faoliyati qonunda belgilangan tartibga muvofiqligi bo‘yicha tegishli tashkilotlar bilan o‘rganish boshlanganini va natijalar haqida yaqin vaqtda axborot berilishini ma'lum qildi.

O‘rganish Eltuzda chop etilgan xabar ortidan boshlandi. Nashrga murojaat qilgan, o‘zini “Namangan tumani 1069 ekipaji a'zosi” deb tanishtirgan shaxsning aytishicha, xizmatda “tanish-bilishchilik, qarindosh-urug‘chilik” avj olgan, taksilarga ulangan haydovchilarga ball tizimi joriy etilgan va unda “qarindoshlar, oshna-og‘aynilar” ustunlikka ega bo‘lmoqda.

Haydovchilar 15 000 so‘m ishga 12 000 so‘m berilayotgani, e'tiroz qilganlarga “ishlasang shu, bo‘lmasa ishlama” degan javob berilayotganini iddao qilgan.

Transport nazorat inspektsiyasi ma'lumotiga ko‘ra, o‘rganish natijalari ommaga taqdim etiladi.