Zoyir Mirzaev amerikalik yirik kompaniya vakillari bilan uchrashdi

Toshkent viloyati hokimi AQShning “Becker & Poliakoff” kompaniyasi vakillari bilan uchrashdi.

Toshkent viloyati hokimi AQShning nufuzli yuridik va lobbistik kompaniyalaridan biri — “Becker & Poliakoff” vakillari bilan uchrashuv o‘tkazdi. Suhbat davomida hokim viloyatning iqtisodiy va investitsion salohiyati haqida ma'lumot berdi.

Uchrashuvda ta'kidlanishicha, Toshkent viloyati mamlakatda to‘g‘ridan-to‘g‘ri xorijiy investitsiyalar jalb etish bo‘yicha yetakchi hududlardan biri bo‘lib, 2024 yilda viloyat iqtisodiyotiga 5,5 milliard dollarga yaqin investitsiya kiritilgan.

Hokim viloyatdagi erkin iqtisodiy zonalar, soliq va bojxona imtiyozlari, zamonaviy infratuzilma hamda ma'muriy yengilliklar investorlar uchun keng imkoniyatlar yaratayotganini qayd etdi.

“Becker & Poliakoff» kompaniyasini strategik hamkor sifatida ko‘ramiz. Bu hamkorlik amerikalik investorlar uchun O‘zbekiston bozorida yangi imkoniyatlar ochadi”, — dedi hokim.

Uchrashuv yakunida tomonlar kelgusidagi aniq investitsion loyihalar va hamkorlik yo‘nalishlarini muhokama qilishga kelishib oldilar.