Isitish mavsumi rasman boshlandi, Buxoroda esa uylar sovuq

Buxoro viloyati hokimining 5 noyabrdan shahar ko‘p kvartirali uylarida isitish mavsumini boshlash to‘g‘risidagi qaroriga qaramay, uylarga issiqlik haliyam yetib borgani yo‘q. Fuqarolarning aytishicha, issiqlik bir kun beriladi, uch kun to‘xtaydi, issiq suv ta'minotida ham uzluksiz muammolar kuzatilmoqda.

Aholi 3–6 noyabrdagi anomal sovuqni ham issiqliksiz o‘tkazgan. Eltuzda chiqqan maqoladan keyin qisman issiqlik berilgan bo‘lsa-da, bu uzoqqa cho‘zilmadi. Hozirga kelib shaharning “Energomarkaz”dan isitiladigan va “Buxorokomunal servis” boshqaruvidagi ko‘p kvartirali uylar hanuz to‘liq isitilmayapti.

Shu yil yozida byudjet mablag‘lari hisobidan uylarda vannaxonalarga sochiq isitgichlar o‘rnatilgani, ular qishda xonalarni isitishi lozim ekani aytilgan edi. Ammo issiqlik ta'minoti yetarli emasligi sababli uskunalar ham deyarli ishlamayapti.

Aholiga ko‘ra, “Energomarkaz” va kommunal servis aybni bir-biriga yuklamoqda. Mavsum yakunida esa isitish xizmatlari uchun to‘lov 5 noyabrdan hisoblanadi, ammo noyabr oxirlab qolganiga qaramay, ko‘pchilik issiqlikni ko‘rmagan. “Nega isitilmagan kunlar uchun ham pul to‘lashimiz kerak?” deya norozilik bildirmoqda fuqarolar.

Telegramda viloyat hokimi Botir Zaripov nomiga ochilgan murojaat guruhida ham har kuni issiqlik bilan bog‘liq yuzlab shikoyatlar yozilmoqda, ammo aholi idoralardan amalda natija ko‘rmayapti.

22 noyabr kuni “Energomarkaz” elektr energiyasi o‘chirilgani sababli issiqlik ta'minoti to‘xtagani haqida e'lon qildi. Fuqarolar esa nega aholi uchun muhim bo‘lgan issiqlik tizimida elektr uzilishi tez-tez yuzaga keladi-yu, hokimiyat binolarida elektr uzilishlari deyarli kuzatilmasligini savol ostiga qo‘ymoqda.

“Yaxshiki o‘sha kuni anomal sovuq emas edi. Agar qattiq sovuq paytida elektr o‘chsa, ahvol qanday bo‘ladi? Mas'ullar issiq kabinetlarda o‘tirib bu muammolarni sezmaydi”, deydi fuqarolar.

Aholi Buxoro shahar hokimiyati va viloyat mutasaddilaridan vaziyatni tez fursatda barqarorlashtirishni so‘ramoqda.