O‘zbekistonning qishda zulmatga cho‘mishiga quyosh aybdormi?

O‘zbekiston Energetika vazirligi mamlakat bo‘ylab elektr ta'minotida ehtimoliy uzilishlar yuzasidan ogohlantirish bilan chiqdi. Unda bildirilishicha buning asosiy sabablaridan biri quyoshli kunlarning kamayishi bilan bog‘liq.

Vazirlikning izohida aytilishicha: «quyoshli kunlarning qisqarishi ortidan quyosh fotoelektr stantsiyalaridan elektr energiyasi ishlab chiqarish hajmi kamaygan. Shu bois, elektr energiyasini ishlab chiqarish va iste'mol balansini tartibga solish, ularning muvozanatini saqlash maqsadida ayrim hududlarda asosan yuqori iste'mol davrlarida (17:00 dan 21:00 gacha) qisqa muddatli elektr ta'minotida uzilishlar kuzatilishi mumkin»

Energetika vazirligining tag‘in izoh berishicha, energetika tizimidagi uzilishlarning sabablaridan yana biri Sirdaryo IESidagi ta'mirlash ishlari bilan bog‘liq. 

Bu haqda xabar bergan Ulysmedia.kz muallifi Askar Jakipovga ko‘ra, stantsiyadagi 2-sonli gaz turbinasida rotor almashtirish ishlari olib borilmoqda. Mazkur ta'mirlash ishlari taxminan bir oy davom etishi kutilmoqda.

Bundan avval 5 dekabr kuni O‘zbekistonda ishga tushirilgan yangi energetika ob'enktlari mamlakatning ichki iste'molini to‘liq qoplashi haqida bayonot berilgan edi. Biroq, yuzaga kelgan vaziyat yuqori minbarlardan turib aytilgan gaplarning real haqiqatga to‘g‘ri kelavermasligini ko‘rsatmoqda.