Urganchdagi poligon «ko‘mildi», ammo vaziyat yaxshilanmadi

Urganch shahri havosining ifloslanib borayotgani haqida Eltuzda murojaat e'lon qilinganidan so‘ng, holatga go‘yoki chora ko‘rilgandek bo‘ldi. Shaharga yaqin, Cho‘lobod mahallasida joylashgan chiqindi poligoniga 50 ta «KamAZ» tuproq keltirib to‘kildi. Ammo bu tuproq poligon hududining hatto o‘ndan bir qismini ham qoplagani yo‘q.

Eltuzga yo‘llangan murojaatga ko‘ra, ekologiya idorasi ko‘zga ko‘rinadigan joylargagina tuproq to‘kib, shu holatni suratga olib “poligon ko‘mildi” degan mazmunda yolg‘on xabar tarqatgan. Ammo, oradan bir hafta ham o‘tmasdan, chiqindilarni yoqish amaliyoti qaytadan boshlangan.

Ayni paytda poligon yaqinida katta sex ishga tushirilgani aytilmoqda. U yerda elim va qog‘oz mahsulotlari ishlab chiqarilyapti, jarayon esa atrof-muhit uchun zararli tarzda olib borilmoqda. Poligondan tarqalayotgan badbo‘y hid va doimiy tutun atrof mahallalar aholisining nafas olishini qiyinlashtirmoqda.

Murojaatda ta'kidlanishicha, chiqindi poligoni deyarli har kecha yoqib yuboriladi. Shamolli kechalarda badbo‘y tutun bir necha kilometr hududga yoyilib, odamlarda ko‘ngil aynishi, qayt qilish, hatto nafas qisilishi holatlarini keltirib chiqarmoqda.

Sog‘liqni saqlash organlarining bu vaziyatga nisbatan befarqligi ham alohida e'tiroz sifatida ko‘tarilgan. Qolaversa, poligon Urganch shahriga juda yaqin joylashgan.

Avvalroq chiqindi poligonini viloyatning chekkaroq hududi – Qo‘shko‘pir tumanining cho‘l qismiga ko‘chirish va'da qilingan edi. Ammo bu va'dalar haligacha bajarilgani yo‘q.

Eltuzga yo‘llangan murojaat mualliflari Ekologiya qo‘mitasi rahbarlaridan vaziyatga jiddiy e'tibor qaratishni, chiqindi maydonini aholi yashaydigan hududdan uzoqroqqa ko‘chirishni va sohaga oid korruptsiyaga qarshi qat'iy choralar ko‘rishni talab qilmoqda.